VOV4.Xơ Đăng - Hneăng hôp mâu kăn xiâm ngăn hnê hriâm ƀă hnê mơjiâng tuăn ngôa rơkê roh má 12 hiăng pơxiâm po a Hà Nôị. Mê cho tơdroăng pêi pro tung rôh hôp mâu ngế xiâm pơkuâ, mâu kăn xiâm ngăn hnê hriâm ASEAN xua Khu xiâm ngăn hnê hriâm ƀă hnê mơjiâng tuăn ngôa rơkê Việt Nam pơkuâ tung hneăng cho kăn hnê ngăn ki pơ’lêh dêi rơpó pơkuâ dêi tơdroăng tơrŭm cheăng hnê hriâm ASEAN hơnăm 2022 ƀă 2023.

Pơxiâm po hneăng hôp mâu kăn xiâm ngăn hnê hriâm ASEAN roh má 12

A hneăng hôp Ngế xiâm ngăn hnê hriâm ƀă hnê mơjiâng tuăn ngôa rơkê ASEAN rôh má 12, mâu Ngế xiâm dêi mâu kong têa tung khu ASEAN tơkŭm tơpui tơno ‘na tơdroăng hnê hriâm ƀă hnê mơjiâng tuăn ngôa rơkê dêi rêm kong têa, tối mâu ƀai hriâm ki khât, túa pêi cheăng ƀă tăng troăng tơrŭm cheăng, mơnhông mơdêk hnê hriâm krá tơniăn dêi tơrêm to kong têa, malối tung pơla klêi kơ’nâi pơreăng COVID-19.

Hneăng hôp xuân tối tơdroăng tơbleăng mâu pơkâ tung tơdroăng pêi pro hnê hriâm ASEAN pơla hơnăm 2021 - 2025 ƀă tơpui tơno mâu tơdroăng ki ê. Klêi hôp hneăng hôp mâu kăn xiâm ASEAN roh má 12, Ngế xiâm ngăn hnê hriâm ƀă hnê mơjiâng tuăn ngôa rơkê Việt Nam, pôa Nguyễn Kim Sơn pơkuâ, hneăng hôp mâu ngế xiâm ngăn hnê hriâm ƀă hnê mơjiâng tuăn ngôa rơkê ASEAN + 3 (ƀă khu tơrŭm cheăng Hàn Quốc, Nhuk, Sinuâ) roh má 6 ƀă hneăng hôp mâu Ngế xiâm ngăn hnê hriâm Đông Á - ASEAN - EAS (mê cho mâu kong têa ASEAN+ 3 ƀă mâu kong têa ki tơrŭm mê cho Mih, Australia, New Zealand, Rusi, Ấn Độ) rôh má 6.

VOV/Tơplôu: Gương