VOV4.Xơ Đăng - Kơxo lơ 10/10, a Hngêi Kuô̆k hô̆i, pơxiâm po hneăng hôp má 16 dêi Vi ƀan pơkuâ cheăng Kuô̆k hô̆i hneăng 15. Po tung 3 hâi, a hneăng hôp mê, Vi ƀan pơkuâ cheăng Kuô̆k hô̆i kô séa ngăn, ăm hnê tối mâu tơdroăng ki kal  kô pơtroh ăm Kuô̆k hô̆i a rôh hôp má 4,  Kuô̆k hô̆i hneăng 15 veăng tơbleăng a hâi pơxiâm po hôp lơ 20/10 la ngiâ.  ‘Na tơdôăng cheăng mơjiâng luât, a rôh hôp mê, Vi ƀan pơkuâ cheăng Kuô̆k hô̆i ăm hnê tối ‘na tơdroăng chêh tơbleăng pơkâ dêi Kuô̆k hô̆i ‘na mơnúa ăm phêp rah xo xúa kơxô̆ ô tô ing tơdoăng tơbleăng tê.

Rôh hôp dêi Vi ƀan pơkuâ cheăng Kuô̆k hô̆i

Vi ƀan pơkuâ cheăng Kuô̆k hô̆i xuân ăm hnê tối tung Hlá mơ-éa tơbleăng tâi mâu tơdroăng chêh tơkŭm, tơdroăng ki kuăn pơlê pâ thế kuăn pơlê pơtroh ăm roh hôp má 4 dêi Kuô̆k hô̆i;  Tơbleăng tơdroăng séa ngăn tí tăng ngăn tơleăng mơnhên, tiâ tơdroăng pâ thế dêi kuăn pơlê pơtroh ăm Kuô̆k hô̆i rôh má 3 dêi Kuô̆k hô̆i, tơbleăng tơdroăng tối tơbleăng ‘na tơdah kuăn pơlê, tơdah xo tơleăng mơnhên hlá đơn dêi kuăn pơlê ƀă tơdroăng séa ngăn tơleăng săm phoăng săm tơkêng, săm tối dêi kuăn pơlê pơtroh ăm Kuô̆k hô̆i hơnăm 2022 ƀă hên tơdroăng kal ki ê.

VOV/Tơplôu: A Sa Ly