VOV4.Xơ Đăng - Kơxo lơ 8/10, a pơlê kong kơdrâm Ƀuôn Ma Thuột, kong pơlê Dak Lak hiăng po tơ’noăng kơ-óu kơphế Việt Nam 2022 (Vietnam Amazing Roast Master 2022) xua Khu ngăn ‘na kơphế Ƀuôn Ma Thuột tơkŭm po. Hneăng tơ’noăng po râ tơnêi têa, ai 35 ngế tơ’noăng lo ing 13 to kong pơlê tung lâp tơnêi têa. Mâu ngế tơ’noăng kô tơ’noăng tối ‘na ki lĕm lơ ôh dêi kloăng kơphế; kơ-ốu; hơ’lâk. Tíu ki nếo dêi hneăng tơ’noăng mê tâng pơchông ƀă mâu hneăng tơ’noăng kơ-óu dêi lâp plâi tơnêi cho xú kơphế Robusta Việt Nam; Mâu ki tơ’noăng thế hơ’lâk a phin ƀă thế rơkê 3 tơdroăng; Tối ki lĕm tơƀrê dêi kơphế kloăng, kơ-óu hơ’lâk pro.

Mâu ki tơ’noăng rah xo xêh chôu tơ’noăng ƀă kơmăi kơ-óu

Hneăng tơ’noăng po sap hâi lơ 6 troh lơ 9/10/2022, veăng séa ngăn ai Khu cheăng’na kih thuât mê 13 ngế ki rơkê hiăng hmâ tung mâu rôh tơ’noăng ‘na kơphế. khu châm điêm ai 6 ngế châm kơ-óu,  râm hơ’lâk Espresso (tung mê ai 3 ngế ki châm cho mâu kong têa ê); 6 ngế châm kơ-óu, râm hơ'lâk pro tung phin.

VOV Tây Nguyên/Tơplôu: Gương