VOV4.Xơ Đăng - Kơxo lơ 3/10, a Tíu pêi cheăng xiâm Đảng, hneăng hôp roh má 6 Khu xiâm pơkuâ Đảng hneăng má 13 hiăng pơxiâm po ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng. Pôa Nguyễn Phú Trọng hiăng tối 5 tơdroăng vâ Tơnêi têa tơpui tơno. Tung mê, tơdroăng apoăng cho séa ngăn tơdroăng cheăng kâ – rêh ối pơlê pơla, ‘no hrê liăn ngân tơnêi têa hơnăm 2022, tiô tối hdrối, pơkâ mơnhông cheăng kâ – rêh ối pơlê pơla, liăn ngân tơnêi têa hơnăm 2023, pôa Nguyễn Phú Trọng pơkâ thế, Tơnêi têa hriăn plĕng nhên Tơbleăng, Hlá mơ-éa tơbleăng dêi Khu pơkuâ Đảng Chin phuh ƀă tơdroăng cheăng a khu xiâm, kơvâ cheăng, kong pơlê tíu pêi cheăng, tơkŭm tơpui tơno, mơnhên mâu tơdroăng ki má môi dêi hơnăm 2022, mơnhên mâu tơdroăng châ tơƀrê; mâu tơdroăng ki tá hâi tơtro, tá hâi rơkê; tiô tối hdrối mâu tơdroăng ivá la ngiâ.

Pôa Nguyễn Phú Trọng, Kăn xiâm pơkuâ hnê ngăn tơpui a chôu phut pơxiâm hôp

Tơtrŏng pơchông ƀă mâu pơkâ, hnoăng cheăng hiăng pơkâ mơ’no vâ hbrâ, mơdât, pơkuâ châ tơƀrê pơreăng, rế rak tơniăn, mơnhông mơdêk cheăng kâ – rêh ối pơlê pơla, ki má lối cho kơjo mơdât liăn chu rơpâ yă, rak tơniăn cheăng kâ kân, tơniăn tơdroăng rêh ối pơlê pơla.

3.Kơxo lơ 3/10, Khu xiâm pơkuâ kuăn pơlê pêi chiâk deăng Việt Nam tơkŭm po hôp khu chêh hlá tơbeăng ‘na ‘’Tơdroăng phiu ro kuăn pơlê pêi chiâk deăng Việt Nam hơnăm 2022’’. Pơtối mê, Leh pơ-ôu pơ-eăng ƀă diâp inâi ‘’100 ngế kuăn pơlê pêi chiâk deăng ki rơkê hơnăm 2022’’ kô châ tơkŭm po a kơmăng hâi lơ 14 khế 10 a Hngêi hơdruê kân, Hà Nội. Kố cho tơdroăng má môi tung mâu tơdroăng pêi cheăng dêi ‘’Tơdroăng phiu ro kuăn pơlê pêi chiâk deăng Việt Nam hơnăm 2022’’. Klăng leh tơbâ 10 hơnăm Tơdroăng phiu ro kuăn pơlê pêi chiâk deăng Việt Nam, hơnăm kố, Khu tơkŭm po pơkâ diâp inâi Kuăn pơlê pêi chiâk deăng Việt Nam ki rơkê ăm 100 ngế kuăn pơlê pêi chiâk deăng teăng 63 ngế kuăn pơlê pêi chiâk deăng môi tiah rêm hơnăm. Klêi kơ’nâi 3 khế tơdah, troh hâi lơ 26/5 hơnăm kố Khu tơkŭm po tơdroăng hiăng tơdah châ 249 hô sơ. Hô̆i đông rah xo hiăng mơnhên hluâ 2 roh ƀă rah xo châ 100 ngế kuăn pơlê pêi chiâk deăng ki má môi vâ diâp inâi kuăn pơlê pêi chiâk deăng Việt Nam ki rơkê. Pơtối mê, rêm kong pơlê rah xo 1 ngế kuăn pơlê pêi chiâk deăng ki rơkê  má môi séa ngăn tiô mâu pơkâ ah, tơdroăng ki rah xo hiăng pơkâ mơ’no.

VOV Tây Nguyên/Tơplôu: A Sa Ly