VOV4.Xơ Đăng - Kơxo lơ 8/9, Pơlê kong kân Hồ Chí Minh pơxiâm po kơchơ mơđah tơbleăng tơmeăm ôm hyô lâp plâi tơnêi Pơlê kong kân Hồ Chí Minh 2022 (ITE HCMC 2022). Pôa Vũ Đức Đam, Ngế pro xiâm hnê ngăn Chin phuh veăng leh pơxiâm po, rơtế lối 1.500 ngế kăn teăng mâ cho kăn teăng mâ mâu kơ koan pơkuâ, mâu ngế rơkê ‘na ôm hyô, mâu khu tê mơdró ôm hyô dêi 45 kong pơlê, pơlê kong kơdrâm tung tơnêi têa ƀă 28 kong têa, kơpong tơnêi tơníu.

Ƀă dó inâi ‘’Rơtế krá tơniăn kơteăng, rơtế xông prôk’’, kơchơ mơđah tơbleăng roh kố pói tơngah po lối 6.000 roh tơkêa tê mơdró pơla mơngế ki rôe ƀă mâu tíu mơđah tơbleăng. Tung tơdroăng po Kơchơ mơđah tơbleăng kơchơ mơdró ai hên hneăng hôp tơpui tơno, hneăng tơpui tơno kân môi tiah: tơpui tơno ôm hyô khu râ kăn xiâm ‘’Troăng rak tơniăn ƀă mơnhông mơdêk ôm hyô lâp plâi tơnêi krá tơniăn’’.

Leh pôe ché pơxiâm po Kơchơ mơđah tơbleăng Ôm hyô lâp plâi tơnêi Pơlê kong kân Hồ Chí Minh 2022

Hneăng hôp tơpui tơno ‘’Thăm pêi pro rơdêi tơdroăng ôm hyô ki xiâm ƀă tơmeăm ki ai hlâu dêi Việt Nam’’, ‘’Hơ’lêh xúa kơmăi kơmok tung pêi ôm hyô’’ ƀă pêi ôm hyô tiô troăng pơkuâ rơkê tíu troh. Tung 3 hâi tơkŭm po Kơchơ mơđah tơbleăng sap ing 8/9 troh 10/9, kuăn pơlê ƀă tơmối ôm hyô kô chiâng ti tăng plĕng hên troăng ôm hyô, tơmeăm ôm hyô tung tơnêi têa ƀă lâp plâi tơnêi nếo ai tơ’nôm tơdroăng ki kơjo kơdroh yă.

A Sa Ly tơplôu ƀă tơbleăng