VOV4.Xơ Đăng - Hâi lơ 4/8, a Pơlê kong kong kân Hồ Chí Minh pơxiâm po leh Mơgêi tơ’noăng khu pơchuât tung Rơ’jiu lâp tơnêi têa roh má 15 hơnăm 2022. Pôa Đồng Mạnh Hùng, Ngế pơkuâ rah chêh mâu tơdroăng, Ngế xiâm pơkuâ chêh tôm xo rơkong dêi rôh tơ’noăng khu pơchuât tung Rơ’jiu lâp tơnêi têa roh má 15 hơnăm 2022 ăm ‘nâi, kố, cho rôh tơ’noăng ai hên kong pơlê veăng tơ’noăng má môi, ai tâi tâng 63 to kong pơlê, pơlê kong kân ƀă hên tíu pêi cheăng dêi Rơ’jiu xiâm Việt Nam.

Kố xuân cho hơnăm ai hên kơxô̆ ƀai veăng tơ’noăng má môi, ƀă lối 500 ƀai tơ’noăng. Mâu ƀai ki châ tơ’noăng Mơgêi châ khĕn kơdeăn hên, hiăng chêh tối tro ki ro dêi tơdroăng rêh ối nôkố. Ki tơ-brê cho mâu tơdroăng tơdjâk troh ‘na djâ pơkâ dêi Hneăng hôp Đảng tung lâp tơnêi têa roh má 13 xúa tung rêh ối, tơdroăng plâ mơdât pơreăng COVID-19, mâu tơdroăng ‘mâi mơnhông cheăng kâ rêh ối.

Malối ai hên  ƀai chêh tối ‘na ngế djâ troăng lĕm pêi cheăng kơhnâ. Kố cho mâu tơdroăng ki tơƀrê apoăng dêi khu tơ’noăng  pơchuât tung Rơ’jiu lâp tơnêi têa  drêng kố. Tíu ki nếo tung tơdroăng tơ’noăng pơchuât tung rơ’jíu lâp tơnêi têa  hơnăm kố Khu tơkŭm po pơkâ tơ’noăng ƀă mơhá pri ngế ki ai rơkong pơchuât lĕm, vâ châ ’nâi ƀă ô eăng mâu ngế ki ai rơkong pơchuât lĕm rơkê, pơchuât  mâu tơdroăng rơkê ro, diâp pri ăm 2 túa; Kih thuât pro ki rơkê ƀă túa xúa tơdroăng ‘na hơ’lêh kơxô̆.

*** Tung tơdroăng dêi Tơ’noăng mâu tơdroăng chêh tối, tơpui pơchuât tung Rơ’jíu lâp tơnêi têa roh má XV, a Rơ’jíu Rơkong tơpui Kuăn pơlê pơlê kong kân Hồ Chí Minh dế tơkŭm po mơđah tơbleăng ‘’Tơdroăng châ tơƀrê cheăng kâ rêh ối pơlê pơla dêi Pơlê kong kân Hồ Chí Minh’’ ƀă ‘’Tơdroăng châ tơƀrê mơnhông mơdêk dêi Rơ’jíu Rơkong tơpui Kuăn pơlê pơlê kong kân’’. Mơđah tơbleăng ‘’Pơlê kong kân Hồ Chí Minh ƀeăn ƀĕng rơkê – mơnhông mơdêk – tuăn pâ’’ mơđah tơbleăng 60 kơtâ um rơtế hên troăng pêi cheăng kâ ki má môi, tơbleăng tâi tâng mâu tơdroăng kal mơnhông mơdêk cheăng kâ, kal kí, mơhno túa lĕm tro, rêh ối pơlê pơla dêi pơlê kong kân mâu hơnăm achê kố.

Mơđah tơbleăng ‘’Tơdroăng châ tơƀrê cheăng kâ rêh ối pơlê pơla Pơlê kong kân Hồ Chí Minh’’

Mơđah tơbleăng ‘’Tơdroăng châ tơƀrê mơnhông dêi Rơ’jíu Rơkong tơpui Kuăn pơlê Pơlê kong kân Hồ Chí Minh’’ tơbleăng troh kuăn pơlê mâu tơdroăng kal, um, tơmeăm ki má môi tơdroăng mơjiâng ƀă mơnhông mơdêk dêi Rơ’jíu Rơkong tơpui Kuăn pơlê pơlê kong kân Hồ Chí Minh tung lối 40 hơnăm hiăng hluâ.

Tung mê, ai mâu tơdroăng djâ tơdroăng tơbâ dêi Rơ’jíu Rơkong tơpui Kuăn pơlê pơlê kong kân môi tiah: Tơdroăng hơdruê xuâng Làn Sóng Xanh, Tơdroăng hơdruê cải lương Bông lúa vàng; Pri tơ’noăng rơxế mái Nam Kỳ Khởi Nghĩa, ƀă hía hé.

A tơdroăng mơđah tơbleăng kố, ối ai hên tơmeăm, khoăng tơbâ, tơmeăm kơmăi kơmok djâ lăm pêi cheăng dêi mâu ngế chêh hlá tơbeăng, ngế rah chêh hlá tơbeăng Rơ’jíu VOH ing mâu rơxông.

Gương - A Sa Ly tơplôu ƀă tơbleăng