VOV4.XơĐăng - Pêi pro troh tơdroăng tơbâ 61 hơnăm hâi trếo ‘mêi dioxin a Việt Nam (10/8/1961 – 10/8/2022), 75 hơnăm Hâi mố đô̆i rong râ, hlâ hía lơ 27/7 ƀă pêi pro hâi xua mau ngế ki tro trếo ‘mêi dioxin Việt Nam 10/8, kơxo lơ 20/7, a tíu ‘măn rak tơmeăm khoăng kong pơlê Kon Tum po Leh pơxiâm mơđah tơbleăng “Trếo ‘mêi dioxin – Tuăn mơno ƀă tiô luât”. Po sap ing hâi lơ 20/7 troh tâi hâi lơ 25/8.

Poê ché po Mơđah tơbleăng “Trếo ‘mêi dioxin – Tuăn mơno ƀă tiô luât” Kon Tum 2022

Mơđah tơbleăng “Trếo ‘mêi dioxin – Tuăn mơno – ƀă tiô luât” tơbleăng vâ chê 400 to um, hlá mơ-éa, kế tơmeăm ƀă hên inâi, môi tiah: Ki ‘mêi dêi trếo dioxin ƀă tơdroăng ki châi heăng ‘na tro trếo ‘mêi dioxin; Việt Nam ‘mâi mơnhông mâu tơdroăng klêi kơ’nâi rôh tơplâ xế trếo pơkeăng; Tơdroăng cheăng dêi Khu ngăn mâu ngế ki tro trếo ‘mêi dioxin Việt Nam ƀă tơdroăng tăng tơdâng tơ’mô ăm mâu ngế ki tro trếo ‘mêi dioxin ƀă hên ki ê.

Thươ̆ng tươ̆ng Nguyễn Văn Rinh, Kăn hnê ngăn Khu ngăn mâu ngế tro trếo ‘mêi dioxin Việt Nam diâp tơmeăm ăm mâu ngế tro trếo ‘mêi dioxin

Ing mâu um, hlá mơéa, kế tơmeăm ki tơbleăng a rôh mơđah, kuăn pơlê, tơmối ƀă mâu vâi pú kong têa ê ‘nâi nhên tâ ‘na klêi kơ’nâi tro trếo ‘mêi dioxin ƀă kong prâi tơnêi tơníu, ivá kuăn mơngế; ‘Na mâu ivá mơ-eăm dêi Đảng, Tơnêi têa, Khu lêng, dêi Khu ngăn mâu ngế ki tro trếo ‘mêi dioxin Việt Nam, dêi kong pơlê Kon Tum tung ‘mâi mơnhông klêi kơ’nâi trâm tơdroăng ki xế trếo pơkeăng klêi kơ’nâi tơplâ ƀă rak ngăn, tŏng kum mâu ngế ki tro; Tơrŭm tơplâ mơdât xúa trếo ki pro tơdjâk hên hĭn troh tơdroăng, môi tuăn tơplâ pâ tơdroăng ki tơdâng ăm mâu ngế ki tro trếo ‘mêi dioxin  Việt Nam.

Katarina Nga tơplôu ƀă tơbleăng