Kơxo lơ 26/4, Khu pơkuâ ngăn Đảng ƀô̆ Pơlê kong kân Hà Nội pơxiâm po Rôh hôp má 12. A rôh hôp, pôa Đinh Tiến Dũng, Kăn pơkuâ hnê ngăn Đảng Pơlê kong kân Hà Nội tối nhên mơjiâng tơdroăng ‘mâi rơnêu Túa pơkâ tơdjuôm mơjiâng Pơlê kong xiâm rôh kố ai pơxúa kal khât tung pơla mơjiâng ƀă mơnhông pơlê kong xiâm ki hdrối ƀă ki ton xŏn tiô pơkâ dêi Khu xiâm pơkuâ tơdroăng kal kí a tơdroăng pơkâ kơxô̆ 15.

Tơpui mâu tơdroăng ki kal ‘na túa pơkâ Pơlê kong xiâm Hà Nội hnoăng cheăng vâ pêi troh a hơnăm 2050, mâu rơkong tơpui tối mơhno nhên hên tíu ki ối tơvâ tơvân tung mơnhông mơdêk cheăng kâ rêh ối pơlê pơla dêi Pơlê kong xiâm, tơdroăng ki ai khât ‘na mơnhông mơdêk cheăng kâ, rêh ối pơlê pơla, tơdroăng ki mâu kế tơmeăm pơlê kong xiâm ƀă thôn pơlê ối ai hên tơdroăng ki ôh tá tơniăn ƀă tăng hlo xiâm kối, pơkâ mơ’no troăng hơlâ pơkâ tơleăng tung túa pơkâ rôh kố.

Tơdrêng amê hlối tơpui tối leăng mâu tơdroăng mơnhông ki xiâm dêi Pơlê kong xiâm Hà Nội, tung mê tối nhên troh mâu tơdroăng ki ai hlâu, ki pơxúa cho mơdêk mâu tơdroăng ki rơkê plĕng, tơdroăng mơhno túa lĕm tro mâu liăn ngân nếo mơdêk tơdroăng ki mơnhông dêi pơlê kong xiâm tung la ngiâ.