Klêi tối tơbleăng a rôh pơxiâm hôp dêi pôa Vương Đình Huệ, Kăn xiâm hnê ngăn Kuô̆k hô̆i, pôa Phạm Minh Chính - Ngế pro xiâm hnê ngăn Chin phuh tối tơbleăng khĕn kơdeăn tơ’nôm tơdroăng pêi pro tiô pơkâ mơnhông mơdêk cheăng kâ rêh ối ƀă liăn ngân Tơnêi têa hơnăm 2022; Tơdroăng pêi cheăng tiô pơkâ mơnhông cheăng kâ - rêh ối ƀă liăn ngan tơnêi têa tung mâu khế apoăng hơnăm 2023.

Pôa Đỗ Văn Chiến, Kăn hnê ngăn Vi ƀan xiâm Măt trâ̆n tơnêi têa Việt Nam tối tơbleăng tâi tâng tơdroăng hnê tối, pâ thế dêi kuăn pơlê ƀă kuăn pơlê pơtroh ăm rôh hôp má 5, Kuô̆k hô̆i hneăng 15. Pôa Tương Thanh Bình, Ngế pơkuâ hnê mơhnhôk cheăng tối tơbleăng tơdroăng séa ngăn tơleăng mơnhên pâ thế dêi kuăn pơlê pơtroh ăm rôh hôp má 4, Kuô̆k hô̆i hneăng 15. Ki tơxâng vâ tối, Kuô̆k hô̆i mơdoh hâi chôu ki u ối dêi peăng kơxo ƀă tá peăng kơxêi hâi lơ 25/5 vâ hôp krê ‘na tơdroăng cheăng kuăn pơlê.