VOV4.Xơ Đăng - Kơxo lơ 19/9, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i pơkuâ ƀă xông tơpui pơxiâm po Roh hôp tơdroăng ‘na luât khế 9/2022 dêi Vi ƀan pơkuâ Kuô̆k hô̆i tơpui ‘na tơdroăng tơkêa bro Luât tê mơdró điê̆n tưh (‘mâi rơnêu). Tơkŭm po tung 5 hâi tơdế, a roh hôp kố, Vi ƀan pơkuâ Kuô̆k hô̆i tơpui 7 tơdroăng tơkêa bro luât ƀă 2 tơdroăng tơkêa Pơkâ, tung mê, ai tơdroăng tơkêa bro Luât tơnêi tơníu (‘mâi rơnêu) vâ tơbleăng Kuô̆k hô̆i a Hneăng hôp má 4, Kuô̆k hô̆i hneăng má 15.

Pơxiâm po roh hôp tơdroăng 'na luât khế 9 dêi Viƀan pơkuâ Kuô̆k hô̆i

Xông tơpui pơxiâm po roh hôp, pôa Vương Đình Huệ tơpui tơno a Hneăng hôp má 4 ƀă séa ngăn tơbleăng a Hneăng hôp má 6 a khế 11 hơnăm 2023. Kăn xiâm hnê ngăn Kuô̆k hô̆i tối nhên, vâ hbrâ séa ngăn tơdroăng tơkêa bro Luât, troh nôkố Vi ƀan Cheăng kâ ƀă mâu kơ koan dêi Kuô̆k hô̆i hiăng tơkŭm po hên hneăng hôp, tơpui tơno.

A Sa Ly tơplôu ƀă tơbleăng