VOV4.Xơ Đăng - Kơmăng lơ 4/8, a Hngêi Hơdruê Pơlê kong kân Hồ Chí Minh tơkŭm po Leh pơxiâm po Tơ’noăng chêh ƀai mơ’no tiô troăng Rơ’jíu lâp tơnêi têa roh má XV-2022 ƀă dó inâi ‘’Ƀeăn ƀĕng pơ’lêh – kâi trâng - xông tơtêk’’. Ing lối 500 ƀai chêh veăng tơ’noăng, Khu tơkŭm po rah 203 ƀai tung roh Mơgêi a mâu tơdroăng chêh tối tơdroăng kal kí pơlê pơla, kơ-êng, tơdroăng hơ’muăn pro pơro, ƀai chêh mơ’no tơdrêng.

Pôa Nguyễn Trọng Nghĩa, Kăn xiâm pơkuâ pơtâng tối tơdroăng kal tơnêi têa xông tơpui hnê mơhno

Xông tơpui hnê mơhno, pôa Nguyễn Trọng Nghĩa, Kăn xiâm pơkuâ hnê ngăn cheăng Đảng, Kăn xiâm pơtâng tối tơdroăng kal tơnêi têa tối, tơ’noăng tơkŭm po tung pơla tâi tâng Đảng, tâi tâng kuăn pơlê ƀă tâi tâng khu lêng dế mơ-eăm tơ’noăng, khŏm pêi pro ƀlêi trâng Pơkâ Hneăng hôp kăn teăng mâ lâp tơnêi têa roh má 13 dêi Đảng; môi hiâm mơno, tơdjuôm ivá pêi pro mâu troăng pơkâ pêi, troăng hơlâ dêi Đảng ƀă Tơnêi têa vâ pro tơniăn ƀă mơnhông cheăng kâ – rêh ối pơlê pơla klêi kơ’nâi pơreăng kân COVID-19.

Pôa Nguyễn Trọng Nghĩa pơkâ thế Rơ’jíu Việt Nam tối krê, kơvâ Rơ’jíu Việt Nam tối tơdjuôm ƀă mâu ngế chêh hlá tơbeăng mơ’no tiô troăng rơ’jíu lâp tơnêi têa kal pâ rơkong hnê dêi pôa Hồ Chí Minh, Kăn xiâm hnê ngăn tơnêi têa hneăng apoăng. Rơ’jíu Việt Nam kal chiâng ƀâng tiâ tối tơdroăng pơlê pơla ƀă xiâm kối mơjiâng troăng hơlâ ki tro, rơdêi tung tơdroăng nôkố, kum rak tơniăn kal kí pơlê pơla ƀă mơnhông mơdêk tơnêi têa, po rơdâ kuăn pơlê pơkuâ dêi hnoăng cheăng, mơdêk ivá pơkuâ dêi Đảng, pơkuâ dêi tơnêi têa ƀă pơlê pơla.

A Sa Ly tơplôu ƀă tơbleăng