Drêng tơbâ 98 hơnăm hâi Hlá tơbeăng Kăch măng Việt Nam, kơxê lơ 19/6, Vi ƀan hnê ngăn kong pơlê Dak Nông tơkŭm po rôh trâm mâ mâu ngế ki cheăng chêh hlá tơbeăng ƀă diâp Pri hlá tơbeăng kong pơlê rôh má 7, hơnăm 2022. Kố cho hơnăm ki ai ƀai pơtroh tơ’noăng hên má môi sap nah troh nôkố ƀă tơdroăng ki veăng ai mâ dêi 116 hlá tơbeăng dêi 78 ngế chêh, khu chêh, tâk 24 ƀai tâng pơchông ƀă rôh tơ’noăng hơnăm nah.

Klêi mê, Vi ƀan hnê ngăn kong pơlê Dak Nông hiăng pơkâ mơnhên 54 ƀai hlá tơbeăng châ kâ Pri Hlá tơbeăng kong pơlê Dak Nông rôh má 7, hơnăm 2022, a 5 túa hlá tơbeăng cho pơchuât, um, hlá tơbeăng in, hlá tơbeăng điê̆n tưh ƀă um hlá tơbeăng.

Pôa Võ Ngọc Tú, Kăn hnê ngăn Khu chêh hlá tơbeăng Dak Nông, Ngế phŏ pơkuâ ‘mâi chêh Hlá tơbeăng Dak Nông tối, mâu ƀai ki pơtroh tơ’noăng hlá tơbeăng kong pơlê rôh má 7 hên ‘na ƀai ƀă ‘na ki rơkê tâng pơchông ƀă mâu hơnăm hdrối. Ki rơhêng vâ tối, hên ƀai hiăng mơhno ‘na tơdroăng ki rơtế prôk dêi hlá tơbeăng ƀă hnoăng cheăng ‘mâi mơnhông, mơdêk cheăng kâ klêi kơ’nâi ai pơreăng kân COVID-19.