Mê cho mâu tơdroăng ki tơƀrê sap ing tơdroăng ki pêi pro túa pêi cheăng môi tíu, tơ’lêi tung điê̆n tưh ‘na chêh bro pơkâ tơleăng mâu hlá mơ-éa. Nôkố, a tâi tâng mâu khu xiâm, kơvâ cheăng, kong pơlê hiăng pêi pro tiô troăng môi tíu, tơdjâk môi tíu, xúa kong ngê̆ thong tin tung tơdah xo, mơdrếo mâu hlá mơ-éa; tơdroăng ki pơkâ tơleăng hdrối hâi pơkâ ƀă tro hâi pơkâ sap ing 95% tơngi klêng.

Kơtăn kố 1 khế, jâ Phạm Thị Lệ, ối a cheăm Lương Phi, tơring Tri Tôn, kong pơlê An Giang lăm troh a Khu tơdah xo ƀă tơvêh ăm tơdroăng hiăng klêi chêh pro hlá mơ-éa  tơring pro hlá mơ-eá mơnhên xúa tơnêi. Tiô pơkâ, kơ’nâi 1 khế nếo ai hlá mơ-éa khêi cho hlá mơ-éa mơnhên xúa tơnêi. La kơ’nâi 20 hâi, jâ hiăng châ hlo tin nhắn chêh tối hlá mơ-éa ki jâ pro hiăng klêi:

  “Hiăng klêi vê hdró tơnêi hlá mơ-eá tơhrâ thế lăm xo kố. Ing troăng kơxô̆ 2, klêi mê troh troăng ô kơxô̆ 5, vâi ăm pin xo tâi tâng. Vâi hnê ăm pin ing kơxô̆ 5  lăm nâp liăn klêi mê ăm a troăng kơxô̆ 2. Mâu vâi nâ ki pro hlá mơ-éa, bú hnê ăm pin pro xuân rĕng há’’.

Kuăn pơlê troh lăm pro hlá mơ-éa a Khu pro hlá mơ-éa môi tíu rĕng, tơ’lêi dêi tơring Tri Tôn bú kal xo kơxô̆ tiô pơkâ tơrêm tơdroăng cheăng ki châ klâ hdrối, klêi mê nâp hlá mơ-éa a môi tíu rĕng, tơ’lêi tơdjâk, xo hlá mơ-éa tơhrâ ƀă troh hâi ki mê ah kơmăi kô pơtroh xêh tin nhắn ăm kuăn pơlê vâ lăm xo dêi hlá mơ-éa ki hiăng pro.

A kố ối hbrâ mâu kơmăi ki tối ăm ‘nâi, châm điêm kăn ƀô̆ vâ kuăn pơlê kô tối ăm ‘nâi ‘na ngế kăn ƀô̆ kŏng chưk, viên chưk. Ki mê, kuăn pơlê xuân chiâng chêh pro nâp hồ sơ điê̆n tưh  ƀă kơmăi  hiăng hbrâ hdrối. Pôa Đỗ Minh Trí, Kăn phŏ hnê ngăn Vi ƀan tơring Tri Tôn ăm ‘nâi:

“Kŏng chưk môi tíu pro rĕng, tơ’lêi hlâu ai tuăn tơmiât tro, pêi tâi hnoăng cheăng tơná ƀă kuăn pơlê, pêi cheăng  ƀă tuăn vâ ƀă kuăn pơlê, ing mê hnoăng cheăng pêi môi tíu rĕng, tơ’lêi tơdjêp a cheăm, tơring cho tro ôh tá ai tơdroăng ki pro pá mơdoh mơdon kơ kuăn pơlê. Nôkố tơring, ƀă cheăm pêi cheăng tâi 5 tơdroăng a mê hlối. 

Ƀă kuăn pơlê Tri Tôn tơdrăng, tơbleăng ăm ‘nâi nhên mâu tơdroăng kuăn pơlê troh lăm pro hlá mơ-éa ki kal vâ. Tâng kuăn pơlê ai tơdroăng vâ tối ‘na  kăn ƀô̆ ki lâi lơ pro pá ăm kuăn pơlê, mê thế tiê drăng tơtrâ a môi tíu pêi cheăng rĕng, tơ’lêi a mê’’.

A Tíu xiâm pêi hnoăng cheăng pro hlá mơ-éa ăm kuăn pơlê  kong pơlê Dak Lak, tíu tơdah xo, tơleăng mơnhên mâu tơdroăng ƀă ăm hlá mơ-éa hiăng klêi pro dêi 20 tíu pêi cheăng dêi kơvâ cheăng, tung mê ai 2 kơ koan kơvâ drô tíu xiâm cho Kŏng an kong pơlê ƀă Bảo hiêm xã hô̆i kong pơlê; tâi tâng mâu hlá mơ-éa ki pro châ tơdah xo, tơvêh ăm hiăng klêi pro a Tíu xiâm xuân châ chêh pro ing kơmăi điê̆n tưh chêh pro ki môi tíu rĕng, tơ’lêi hlâu dêi kong pơlê ƀă phần mềm dêi kơvâ cheăng ki mê.

Ngoh Lương Trung Thành, ối a tơring Ea H’Leo ăm ‘nâi; bú ton dâng 5 phut tê chêh tơ’lêi hlâu, ngoh hiăng pro klêi hlá mơ-éa ki kal vâ pâ hơ’lêh ƀâng vê rơxế ƀă tơkôm cho hlá mơ-éa ăm ing troăng pơtroh kơthô dêi tíu tơpui phôn:

“Nah rêm rôh lăm pro hlá mơ-éa thế lăm troh hên hdrôh mơdoh hâi chôu la nôkố bú prôk troh a tíu pêi cheăng pro iâ tê hiăng klêi. Hlo rĕng, tơ‘lêi ‘nâng ăm pơlê prôk lăm’’.

Vâ mơdêk ki tơƀrê tung tơdroăng pro hlá mơ-éa, nôkố, mâu kơ koan, tíu pêi cheăng pro hlá mơ-éa tơdah xo ƀă pro ăm hlá mơ-éa hiăng klêi pro a Tíu xiâm pêi hnoăng cheăng dêi tơnêi têa a kong pơlê Dak Lak dế mơdêk hnoăng cheăng tơbleăng pêi klêi hlá mơ-éa tiô tơdroăng “Ôh tá tơkôm’’ ƀă mâu túa pro hlá mơ-éa iâ hâi, ki tơ‘lêi, tơdroăng pro hlá mơ-éa ôh tá tơdjâk troh hên kơ koan, tíu pêi cheăng.

Tối ‘na ki tơƀrê dêi túa pêi cheăng môi tíu rĕng, tơ ‘lêi tơdjêp, pro hlá mơ-éa rĕng tơ’lêi ƀă điĕn tưh tung tơdroăng pro hlá mơ-éa, Phŏ yăo sư, Tiê̆n sih Ngô Thành Can, Ngế xiâm phŏ kơvâ cheăng tơkŭm pro hlá mơ-éa, Học viện Hành chính Kuô̆k ya tối tiah kố, tơdroăng tơbleăng, pêi tiô luât pơkâ môi tíu pêi cheăng rĕng, tơ’lêi, môi tíu pêi cheăng rĕng tơ’lêi tơdjêp hiăng tơkâ luâ hên tơdroăng pá tung pro hlá mơ-éa ki hên hĭn, tơvâ tơvân.

Khu cheăng ‘na pro hlá mơ-éa tối tơdjuôm, khu pêi hnoăng cheăng tơnêi têa tối krê châ pêi cheăng tơ’lêi hlâu, hiâ. Ƀă tơdroăng ki kal má môi cho pro pơxúa  tro kơ tuăn kuăn pơlê:

“Tơkŭm ƀă môi tíu tơ’lêi hlâu vật lý ƀă điê̆n tưh vâ pro tơ’lêi hlâu ăm mâu ngế, khu tơrŭm cheăng, pro kơdroh hâi chôu pêi cheăng nâp liăn. Pakĭng ki tơ’lêi mê, ối kơdroh chôu hâi pêi xua pin hiăng kơdroh kơxô̆ tơdroăng cheăng môi tíu tơ’lêi hlâu, kơdroh kơxô̆ liăn pơtối xúa hlá mơ-éa ki chêh ‘măn mâu tơdroăng, kơdroh hâi chôu tơkôm, pro klêi ƀă kơdĭng mâu kơxô̆ liăn ‘no ki ê. Pro pơxúa ƀă pro ăm kuăn pơlê loi khât.

Nôkố tâi tâng mâu kong pơlê xuân hiăng pơkâ tơbleăng tơdroăng Tơkêa bro “hơ’lêh nếo tơdroăng cheăng pêi tiô luât pơkâ “môi tíu tơ’lêi hlâu”, “môi tíu rĕng tơ’lêi tơdjêp” tung tơdroăng pro mâu hlá mơ-éa’’, ƀă tơdroăng pơkâ troh hơnăm 2025,  hơ’lêh pro hồ sơ kơxô̆, mâu hlá mơ-éa, ƀă tơdroăng hiăng klêi pro hlá mơ-éa  a tâi tâng tá “Môi tíu pêi cheăng rĕng tơ’lêi’’ mâu tíu pêi cheăng, kơvâ cheăng, ƀă mâu tíu pêi cheăng râ tơring, cheăm.