Pôa Tô Lâm, Kăn xiâm pơkuâ hnê ngăn Đảng ƀă pôa Phạm Minh Chính, Ngế pro xiâm hnê ngăn Chin phuh veăng leh a Hngêi trung ai tíu kâ koi ối pơtê pơtối râ Má môi ƀă Má Péa Đồng Đăng, cheăm Đồng Đăng, kong pơlê Lạng Sơn. Leh pơxiâm pro tơkŭm po a 17 tíu mơ’no tơdrêng tơbleăng ƀă 104 tíu mơ’no tơdrêng tung hyôh măng lâp tơnei têa.

Tơbleăng a rôh leh, pôa Tô Lam tối nhên, tung pơla mâu hơnăm kăch măng, Đảng, Tơnêi têa đi đo tơmâng, ‘no liăn mơnhông hnê hriâm ƀă hnê mơjiâng tuăn ngôa rơkê a kơpong tơkăng kong. Khu xiâm kal kí hiăng pơkâ ’no liăn pro 284 to Hngêi trung ai tíu kâ koi ối pơtê pơtối râ a 248 to cheăm tơkăng kong a tơnêi. Kố cho môi troăng hơlâ ki ‘ló, ai pơxúa lĕm tro, mơhno ki Đảng, Tơnêi têa tơmâng kơ kuăn pơlê a kơpong tơkăng kong, kơpong hơngế hơngo ối kơtiê xơpá.

Pôa Tô Lâm, Kăn xiâm pơkuâ hnê ngăn Đảng pơkâ thế râ ủi Đảng, mâu kăn mâu kong pơlê tơmâng pêi kơtăng, đi do séa ngăn, tăng ngăn hlối hnê pêi vâ rĕng châ tơleăng pê klêi mă môi, tro má môi, tơƀrê má môi, teăm ăm xúa mot hơnăm hriâm 2027-2028. Tơdrêng amê, kơvâ hnê hriâm thế pro hngêi trung rơtế ƀă mơjiâng hnê hriâm tiô túa nếo, tŭm tơdroăng.

Pakĭng tơdroăng hnê chư, kal tơmâng khât troh hnê mơngế, ăm hriâm tơ’nôm ‘na tuăn lem tro, hiâm mơno lĕm ƀă hlê luât ki tro ăm vâi o hok tro, púi vâ mơnhông tơná hlối tơngăm ‘na tơdroăng hmâ pêi pro lĕm ing nah dêi pơlê.