Pêi pro Tơdroăng tơkêa bro pêi cheăng 500 hâi măng tí tăng, chiâ rôu xo, tơkŭm ƀă mơnhên inâi kơxêng kiâ mố đô̆i, khu pêi cheăng dêi Khu pơkuâ ngăn lêng cheăm Ba Động, kong pơlê Quảng Ngãi tơrŭm ƀă mâu khu  pêi cheăng dêi cheăm po rơdâ tí tăng a kơnhŏng têa krông Nước No, thôn Ba Liên, cheăm Ba Động ƀă châ hlo 3 kơxêng kiâ mố đô̆i.

Klêi kơ'nâi tí tăng, tơkŭm kơxêng kiâ mố đô̆i, khu pêi cheăng mố đô̆i châ hlo mâu tơmeăm khoăng ki ai tơdjâk troh mố đô̆i môi tiah kơdjiăn ếo, tăng, ning nong, kơxái ning nong. Mâu tơmeăm khoăng kố châ tơkŭm, 'măn rak rơtế ƀă kơxêng tiô pơkâ, gum ăm tơdroăng ki mơnhên, tơdrêng amê rak tơniăn tơdroăng krih, nhuô̆m ƀă mâu mố đô̆i ki hiăng hlâ tung tơplâ xâ.