Mâu ƀai tơpui tơno a Hneăng hôp tối tiah kố, kong pơlê Quảng Ngãi dế ai hên tơdroăng vâ chiâng mâu ivá mơnhông mơdêk nếo, ing kơmăi kơmok, cheăng kâ têa kơxĭ, kơno tuk, logistics troh ôm hyô ƀă pơhlêh hriê̆n plĕng nếo tơmiât pêi rơkê.

Tung mê, Kơpong cheăng kâ Dung Quất pơtối cho tíu xiâm cheăng kơmăi kơmok ki kal, rơtế ƀă mâu kơvâ hrik pơhriâ - xo têa châu, hyôh on gas - on tơhrik ƀă troăng hơlâ mơnhông Tíu xiâm hrik pơhriâ - xo têa châu ƀă On tơhrik tơnêi têa.

Tơdroăng mơnhông nếo dêi Quảng Ngãi xuân po troăng tơrŭm ing kong ngo, kơpong tơbăng ngo kân troh a tơbăng, têa kơxĭ ƀă chuăn rơlố; tung mê troăng prôk Tây - Đông ing bo cheăng Bờ Y tơkâ luâ Tây Nguyên, kong ngo Quảng Ngãi troh a têa kơxĭ ƀă kơno tuk Dung Quất châ mơnhên cho môi tung mâu troăng ki xiâm vâ mơnhông.

Ki tơ'lêi hlâu 'na têa kơxĭ, kong ngo ƀă troăng tơdjêp Đông - Tây pro tơ'lêi hlâu vâ kong pơlê mơdêk tơdjêp ƀă Chu Lai, Đà Nẵng, Gia Lai ƀă mâu kơpong ki achê. Ƀă ôm hyô, kô mơnhông nếo pro tơ'nôm pro tíu tơdjêp Lý Sơn, Mỹ Khê ƀă Măng Deang. Mâu kăn teăng mâ xuân tối nhên mâu tơdroăng pá puât 'na luât pơkâ, hngêi trăng, troăng klông ƀă tơdjêp kơpong, tơbleăng mâu troăng hơlâ tah lôi tíu ki pá tơvâ tơvân vâ kong pơlê Quảng Ngãi mơnhông tơƀrê.