VOV4.Xơ Đăng - Pôa Phạm Bình Minh, Kăn cheăng tung Khu xiâm kal kí, Ngế pro xiâm phŏ hnê ngăn tơnêi têa hiăng kĭ Mơ-éa ki kal 724 dêi Ngế pro xiâm hnê ngăn Chin phuh ‘na tơdroăng tơniăn pơlê pơla, rak tơniăn troăng klông tung roh pơtê leh Hâi mơjiâng tơnêi têa lơ 2/9. Tung mê Ngế pro xiâm hnê ngăn tơnêi têa pơkâ thế, ai troăng tơniăn ivá, ki dâi lĕm ƀă tơniăn ƀă tơdroăng rơxế pơto tơmối ƀă  tơmeăm, ki má lối cho tơdroăng pơto tơmối ƀă troăng prôk chêng, troăng têa ƀă troăng tơƀai tung roh hâi pơtê leh Hâi mơjiâng tơnêi têa 2/9 ƀă tơdroăng prôk lăm dêi hok tro, sinh viên.

Kan sát rak tơniăn troăng klông ƀă rơxế thăm pêi cheăng a roh leh 2/9

Pơkâ mâu tíu pơto tơmối, mâu tíu pêi cheăng ‘na rơxế pơto tơmeăm, tơmối ki kân, pêi pro kơtăng mâu pơkâ dêi luât rak tơniăn, rak tơniăn troăng klông rơxế kơtâu; ôh tá ăm ai tơdroăng tơbriât dêi pó pro chôm troăng klông a mâu tơraih rơxế, hngêi tơkôm vâ to rơxế, kơno, tơdroăng pơto lối hên tơmối to, pơto mơngế to tung rơxế hluâ pơkâ. Hbrâ mơjiâng troăng tơkŭm po prôk troăng tơniăn, ki má lối a mâu troăng kân, kơpong tơ’lêi trâm tơklâm rơxế, chôm troăng klông, mâu troăng prôk ki xiâm mot a Hà Nội ƀă pơlê kong kân Hồ Chí Minh.

*** Vâ rak tơniăn troăng prôk rôh leh lơ 2/9, Vi ƀan hnê ngăn kong pơlê Dak Lak hiăng pơkâ thế mâu khu lêng môi tiah: Khu séa ngăn troăng prôk, kăn sat gâk troăng prôk ƀă hên ki ê mơdêk hnoăng cheăng lăm pơtrui, séa ngăn, pơxâu phâk mâu ngế ki pro xôi a troăng prôk; mơdêk hnê tối troh mâu rơxông kuăn pơlê, malối cho mâu hngêi trung hriâm vâ kuăn pơlê pêi pro kơtăng Luât troăng prôk.

Tơdrêng amê, tơbleăng po mâu tíu ki krếo phôn tơdrêng a ƀơrô kăn sat gâk troăng prôk Kŏng an kong pơlê kơxô̆ phôn: 0262.3692888; Khu ngăn troăng prôk ƀă rơxế kơtâu Dak Lak mâu kơxô̆ khĕn tơdrêng cho: 0916.107447; 0983.436091 ƀă khu rak ngăn tơniăn troăng prôk kong pơlê Dak Lak kơxô̆ phôn: 0914.032356, vâ tơdah xo, pơkâ tơleăng tối tơbleăng ‘na tơdroăng ki tơniăn a troăng prôk, tơniăn tung pơlê pơla.

Pôa Bùi Văn Ngọc, kăn pơkuâ ƀơrô Khu gâk kring tơniăn troăng prôk kong pơlê Dak Lak ăm ‘nâi: sap ing apoăng hơnăm troh nôkố, tơdroăng rak tơniăn troăng prôk a Dak Lak, châ kơdroh a 3 tơdroăng pơkâ, cho kơxô̆ ngế tơklâm rơxế tơklâm, kơxô̆ ngế hlâ ƀă kơxô̆ ngế tro rong. Ki  nhên, tung lối 8 khế hdrối nah, a kong pơlê Dak Lak ai 151 rôh tơklâm rơxế ki ó, pro 112 ngế hlâ, tro rong 76 ngế. Tâng pơchông ƀă khế kố hơnăm nah kơdroh 9 rôh, 11  ngế hlâ ƀă 35 ngế tro rong.

*** Tơdroăng ing Kŏng ti tơlo liăn cheăng Tơraih rơxế Hà Nội tối ăm ‘nâi, vâ kum tung tơdroăng prôk lăm dêi kuăn pơlê tung roh pơtê leh 2/9, Kŏng ti kô tơ’nôm 580 toăng rơxế a mâu tơraih tơxế. Pơcháu mâu tơraih rơxế pơkâ pêi vâ pơto tơmối, hbrâ tŭm tơmeăm khoăng môi tiah vĕ, tíu tê vĕ, tê vĕ ăm mâu troăng ki kơtâu hên ƀă hnê mơhno mâu khu cheăng pơkuâ ƀă hnê mơhno pêi pro kơtăng tơdroăng tơniăn gâk kring, tơniăn troăng klông, hbrâ mơdât chếo, mơgrúa kong prâi a tơraih rơxế.

Tơdrêng amê, tơrŭm ƀă tíu xiâm pơkuâ rơxế buis dêi Kŏng ti xiâm pơto tơmối Hà Nội vâ mơdêk roh rơxế kơtâu hên ƀă kơxô̆ rơxế buis vâ pơto teăm tơdrêng tơmối troh a tơraih mot tung pơlê kong xiâm. Tiô Kŏng ti tơlo liăn cheăng Tơraih rơxế Hà Nội, kơxô̆ tơmối prôk lăm tung roh leh 2/9 tâk hên, ai drêng tâk hên tơmối to rơxế prôk a kơxê hâi lơ 31/8 bă hâi lơ 1/9; kơxô̆ tơmối vêh tơkŭm ki hên a hâi lơ 4/9/2022.

A Sa Ly - Katarina Nga tơplôu ƀă tơbleăng