Hâi lơ 26/6, Vi ƀan hnê ngăn kong pơlê Lâm Đồng ai hlá mơ-éa pơtroh pơkâ thế Khu pơkuâ rak ngăn tơdroăng tơkêa bro troăng prôk ngi kong pơlê thăm mơdêk hnoăng cheăng rak tơniăn tung pêi cheăng, hbrâ mơdât tơnêi tơhnah ƀă mơdêk rĕng tơdroăng ki bro tơdroăng tơkêa ‘mâi rơnêu, po rơdâ văng Prenn Đà Lạt. Tiô Vi ƀan hnê ngăn kong pơlê Lâm Đồng, xua tơdroăng ‘na kong prâi ôh tá tơniăn, kong mêi kân rơtế ƀă tơdroăng ki troăng a văng Prenn Đà Lạt ai tơnêi tơníu ôh tá tơniăn, ngo rơnâk, ki ôh tá tơdâng ‘na taluy âm – dương hên, tơ’lêi ai tơdroăng ki tơhnah tơnêi ƀă mơni kô bro ôh tá tơniăn tung pơla bro troăng kố.

Vâ tơdroăng tơkêa kố pêi klêi tro pơkâ, rak tơniăn khât tung pơla bro, Vi ƀan hnê ngăn kong pơlê Lâm Đồng pơkâ thế Khu pơkuâ ngăn tơdroăng tơkêa bro troăng prôk kong pơlê séa ngăn kơtăng tơdroăng ki bro xúa hên mâu ngế cheăng, kế tơmeăm mơdêk rĕng tơdroăng ki bro. Tung mê, pêi pro kơtăng mâu troăng hơlâ rak vế mâu ngế ki pêi cheăng, xing xoăng tôh pêi cheăng tơtro vâ teăm tŏng kum, tối tơbleăng drêng ai tơdroăng xía vâ.

Rơtế amê, troăng prôk, on séa bâ eăng, hngêi trăng troăng klông kih thuât, troăng tŏng kum mâu ngế ki trâm ôh tá tơniăn, rak tơniăn krúa, tơnêi tơníu tâ tá ƀă hên ki ê vâ ăm xúa troăng prôk sap ing Kơpong ôm hyô xí Datanla troh ko văng Prenn (tơkoh ƀă tơraih rơxế lăm ngi kong pơlê) hdrối hâi lơ 30/7/2023.