Vi ƀan hnê ngăn kong pơlê Dak Lak nếo tơrŭm ƀă Khu xiâm ngăn Kăn sat Pơkuâ ngăn hlá mơ-éa ‘na rak tơniăn pơlê pơla (Khu xiâm ngăn Kŏng an), Kŏng an kong pơlê ƀă Kŏng ti GeneViet tơkŭm po tơdroăng tơdah xo túa ADN dêi nhŏng o rơpŏng hngêi mâu mô  đô̆i ki tá hâi ‘nâi inâi. Kố ôh tá xê to tơdroăng pêi pro mơnê a hâi lơ 27/7 mê ối cho hvêa chêng prôk ki nhên “Cheăng pêi thâ 500 hâi măng mơdêk rơdêi tăng rôu, tơkŭm ƀă mơnhên inâi kơxêng kiâ mô đô̆i” dế châ tơbleăng pêi tung lâp tơnêi têa.

Tiô riân ngăn, tung lâp kong pơlê Dak Lak nôkố ai 15.222 to tơnâp kiâ mố đô̆i. Tung mê, mâu kơ koan ki ai tơdjâk hiăng lăm ngăn, chêh xo inâi dêi 10.235 to kơxêng kiâ mố đô̆i; nếo ai 5.911 ngế châ mơnhên inâi, ối 4.324 ngế mố đô̆i nếo tá hâi ‘nâi inâi, hơnăm.

Ki rơhêng vâ tối, ai 2.706 ngế mố đô̆i xuân ối ai tŭm nhŏng o ki ai tŭm tơdroăng ki vâ séa ngăn ADN, ƀă tâi tâng 3.865 ngế. Rôh tơbleăng kố pơkâ pêi tơdah xo lối 80% túa ai tŭm tơdroăng vâ séa ngăn ADN tơnêi têa, gum ăm cheăng pơchông, mơnhên inâi kơxêng kiâ mố đô̆i tung la ngiâ.

Vâ cheăng tơdah xo túa châ tơkŭm po tơdâng tơ’mô, tro pơkâ ƀă rak vế tro tơdroăng ki tơdrăng nhên, Kŏng an kong pơlê Dak Lak hiăng xoăng 12 tíu xo túa tung lâp kong pơlê, pơtroh khu ki pêi cheăng sap ing râ kong pơlê troh râ cheăm hnê mơhno tơdrêng, tŏng gum kuăn pơlê chêh pro klêi hồ sơ, mơnhên tơdroăng ƀă xo túa vâ séa ngăn. Đăi tă Võ Hùng Tường, Ngế pơkuâ ƀơrô Kăn sat Pơkuâ ngăn hlá mơ-éa ‘na tơniăn pơlê pơla, Kŏng an kong pơlê Dak Lak ăm ‘nâi:

“Ngin tơrŭm krá tơniăn ƀă khu ki pêi cheăng dêi Khu xiâm Pơkuâ ngăn hlá mơ-éa, xing xoăng khu ki pêi cheăng lăm troh a 12 tíu ki xo túa ƀă tơkŭm xo sap ing hâi lơ 23 troh hâi lơ 26/7/2026. Rêm tôh pơrá ai khu ki cheăng tung pơla xo xuân môi tiah mơnhên inâi, hơnăm dêi mâu nhŏng o rơpŏng hngêi vâ rak tơniăn tơdroăng ki xo túa séa ngăn ăm gá tro”.

Ai mâ a tíu ki xo túa a bêng Ea Kao, jâ H'Blak Niê tơdroăng tơkôm dêi rơpŏng hngêi. Miê xiâm dêi jâ cho mố đô̆i hiăng hlâ hên hơnăm la ôh tá ‘nâi tíu ki tơplâ, tíu hlâ lơ tơnâp kiâ ulâi ôh. Ƀă rơpŏng jâ, cheăng ki xo ADN ôh tá xê to hlá mơ-éa ki kal mê ối cho rôh vâ tơdjêp môi to troăng hơlâ nhŏng o tơklâ hiăng ton xua tơplâ.

“Đảng ƀă Tơnêi têa xo túa ADN vâ tăng nhŏng o rơpŏng hngêi ngế mố đô̆i ki hlâ, rơpŏng hngêi ngin phiu ro khât, rế tơngah vâ ngin ai tơ’nôm tơdroăng ki tăng hlo miê dêi tơná”.

Tơdroăng ki kal dêi rôh po tơdroăng kố ôh tá xê ối to a kong ngê̆ ki rơkê plĕng mê ối ai pơxúa nhên khât. Rêm túa ADN châ rak vế hâi kố gá tá hâi ‘nâi tơdrêng, la kô chiâng môi tơdroăng ki tơdjêp kal tung tíu chêh ‘măn tơdroăng kal tơnêi têa, hbrâ rơnáu vâ pơchông drêng ai tơ’nôm tơdroăng ‘na kơxêng kiâ mố đô̆i châ tơkŭm. Mê xuân cho túa ki rơkê plĕng ƀă tơdroăng “Ai tơdroăng niân môi tiah hâi kố cho xua ing mâu jâ noâ pâ pôa nah”, gum tơdroăng mơnê ôh tá la lâi pơtê a mâu tơdroăng xối tơbâ mê pơtối ƀă mâu tơdroăng cheăng pêi ki ai pơxúa.

Xua klêi kơ’nâi lối tơdế chal hơniâp lĕm, tơdroăng ki hên rơpŏng tơkôm má môi xuân cho ai môi tiah nhŏng o rơpŏng hngêi dêi tơná châ krếo tro inâi, châ vêh dêi ƀă pơlê xiâm. Ƀă rêm túa ADN châ xo cho tơnôm tơdroăng tơngah vâ mâu rôh tơkŭm klêi kơ’nâi tơplâ rĕng chiâng tơdroăng ki ai khât.