Troh kơxo hâi lơ 30/6, mâu kơ koan, khu grup tung pơlê kong kơdrâm Đà Lạt, kong pơlê Lâm Đồng hiăng veăng tơlo liăn, veăng kum rơpŏng hngêi ki ai ngế hlâ tung rôh tơnêi tơhnâp a Đà Lạt lối 200 rơtuh liăn. Klêi ai tơdroăng xiá vâ tơnêi tơhnâp pro 2 ngế hlâ , mâu tíu pêi cheăng, kơvâ cheăng, kuăn pơlê hiăng lăm pôu hơlêm, mơhnhok ƀă rôh apoăng hiăng veăng kum mơngế ki xơpá.

Tung mê, Vi ƀan Măt trâ̆n tơnêi têa Việt Nam kong pơlê Lâm Đồng veăng kum lối 30 rơtuh liăn, Khu pơkuâ hbrâ ví xía vâ tí tăng tŏng xo mâu ngế hliăng tiâ kong pơlê Lâm veăng kum 20 rơtuh liăn, Khu lo tŏng veăng kong pơlê Lâm Đồng veăng kum 3 rơtuh liăn, mâu tíu pêi cheăng tung pơlê kong kơdrâm Đà Lạt veăng kum 73 rơtuh liăn, ngế pơkuâ ƀă tíu pêi cheăng dế mơjiâng pro tơmeăm khoăng kơjo kum 86 rơtuh liăn.

Tâi tâng kơxô̆ liăn klâ ăm, kum rơpŏng hngêi ki trâm xía vâ mê troh nôkố châ lối 200 rơtuh liăn. Tơdrêng amê, klêi mơhnhôk pơlê pơla veăng kum, pơlê kong kơdrâm Đà Lạt xuân hiăng pơcháu kơxô̆ liăn 20 rơtuh liăn kum ăm 3 ngế ki tro rong iâ tung rôh tơnêi tơhnâp.