Kơxo lơ 10/5, a Labuan Bajo, Indonesia, pôa Phạm Minh Chính, Ngế pro xiâm hnê ngăn tơnêi têa trâm tơpui tơno ƀă khu râ kăn xiâm Khu tơrŭm mâu kong têa Đông Nam Á (ASEAN) rôh má 42. Pơxiâm po Rôh hôp, pôa Joko Widodo, kăn xiâm pơkuâ kong têa Indonesia mơnhên tối khât Rôh hôp khu râ kăn xiâm ASEAN kố po tung pơla cheăng kâ liăn ngân lâp plâi tơnêi tá hâi ‘mâi mơnhông tâi tâng, tơxup tơbriât tung tơdroăng cheăng la ngiâ tơnêi têa rế tâk, rơtế ƀă hên tơdroăng ki hơ’lêh ôh tá tơniăn, xơpá vâ ‘nâi hdrối.

Kăn xiâm pơkuâ kong têa Indonesia tơngah tiah kố, tơrŭm ƀă mơ-eăm tơdjuôm ivá dêi tâi tâng mâu kong têa tơrŭm cheăng tung ASEAN cho tơdroăng ki apoăng vâ ASEAN mơdêk rơdêi hnoăng cheăng pơkuâ djâ hơniâp lĕm ƀă mơdêk tung kơpong.

Ngế pro xiâm hnê ngăn Chin phuh - pôa Phạm Minh Chính rơkâu pôa Joko Widodo ƀă tơnêi têa Indonesia pôu râng dêi hnoăng cheăng pro kăn xiâm hnê ngăn ASEAN 2023. Ngế pro xiâm hnê ngăn tơnêi têa tối nhên tơrŭm cho ivá ki ƀlêi chiâng, ƀă athế mơhno tối ing hiâm mơno ƀă tơdroăng pêi pro nhên. ‘Mâi mơnhông tơrŭm ƀă môi tuăn cho hnoăng cheăng ki xiâm ăm môi ASEAN tơniăn krê ƀă mơ-eăm.