Tiâ  kơ-êng cho Ngế xiâm ngăn ‘na Liăn ƀă Ngế xiâm cheăng Khoa hok  ƀă Kong ngê̆; mâu Phŏ ngé pro xiâm hnê ngăn Chin phuh, Ngế xiâm hnê ngăn, Ngế pơkuâ kơvâ cheăng tơdjâk troh rơtế veăng tiâ, mơnhên tơdroăng kơ-êng. Pôa Lê Minh Hưng, Ngế pro xiâm hnê ngăn Chin phuh  tiâ tơdrêng tơdroăng kơ-êng ‘na mâu hnoăng cheăng dêi Chin phuh. Mâu tơdroăng kơ êng péa khu ‘na tơdroăng kơ-êng hiăng châ mâu kăn Kuô̆k hô̆i tơmâng khât, tơbleăng a rôh hôp tơpui tơno ‘na cheăng kâ- pơlê pơla hâi lơ 30 ƀă hâi lơ 31/10, hiăng ai 19 ngế kăn tơpui ‘na mâu tơdroăng ‘na liăn, 11 ngế kăn tơpui ‘na mâu tơdroăng khoa hok ƀă kong ngê̆.

Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, kơ- êng ƀă tiâ tơdroăng kơ-êng cho tơdroăng séa ngăn tơdrêng, mơhno nhên hnoăng cheăng dêi Kuô̆k hô̆i, Chin phuh ƀă mâu kơ koan a ngiâ kuăn pơlê ƀă tơdroăng pêi pro tiô mâu tơdroăng tơhrâ, cheăng pêi châ pơcháu ƀă mâu tơdroăng hơ ‘lêi kơ’nâi mâu rôh hôp kơ-êng tiâ hdrối mê. Rôh kơ-êng tiâ drêng kố pơtối mơhno ki tơmâng khât dêi Kuô̆k hô̆i  rơtế ƀă Chin phuh, tơmâng a mâu tíu ki pá, mơhno nhên mâu tơdroăng xơpá, tơvâ tơvân, vâ teăm tah ki pá, mơhnhôk ƀă xúa ai pơxúa mâu tơmeăm khoăng, mơdêk pêi tơƀrê, tâk, tơniăn cheăng kâ kân, mơnhông rĕng, krá  tơniăn ƀă mơnhông tơdroăng rêh ối dêi kuăn pơlê.