Kơxo lơ 5/12, Khu xiâm pơkuâ tơdroăng kal kí, Khu pơkuâ ngăn Tíu xiâm Đảng tơkŭm po Rôh hôp lâp tơnêi têa hriăn ngăn, hriâm tâp, pêi pro kơtăng mâu Tơdroăng pơkâ Rôh hôp má 6, Khu pơkuâ ngăn Tíu xiâm Đảng hneăng 13, ƀă tơdroăng ki ‘no tơdrêng ing um tơvi hlối ‘no tơdrêng ing troăng hyôh internet, tơdjêp mâu tíu mơ’no Tơnêi têa a Rôh hôp Diên Hồng (Hngêi Kuô̆k hô̆i) ƀă mâu tíu mơ’no tung lâp tơnêi.

A rôh hôp, mâu kăn hmâng mâu tơdroăng ‘na “Pơtối mơjiâng ƀă pêi pro klêi Tơnêi têa hnoăng pơkuâ xah hô̆i chuh ngiah Việt Nam tung hneăng nếo”; “Pơtối hơ’lêh nếo túa pơkuâ, hnoăng pơkuâ dêi Đảng ƀă khu pơkuâ tơdroăng kal kí tung hneăng nếo”; ‘Pơtối mơdêk xúa kơmăi kơmok, pơ’lêh ki rơkê plĕng tơnêi têa troh hơnăm 2030, troăng ngăn troh hơnăm 2045”; “Troăng tơmiât túa pơkâ tâi tâng tơnêi têa hneăng hơnăm 2021 – 2030, troăng ngăn troh hơnăm 2050”. ‘Na hnoăng cheăng, troăng hơlâ ki kal pơtối mơjiâng ƀă pêi klêi tơnêi têa hnoăng pơkuâ xah hô̆i chuh ngiah Việt Nam tung hneăng nếo, kăn xiâm pơkuâ Tơnêi têa Phan Đình Trạc ăm ‘nâi, pơtối mơdêk tơdroăng ki hnê tối, tơbleăng hnê hriâm, mơdêk ki hlê plĕng ‘na Tơnêi têa hnoăng pơkuâ xah hô̆i chuh ngiah Việt Nam.