Tung hơnăm 2025, kong mê khía mơhot têa kân lân lu hiăng pro tơ’nhiê hên hngêi trăng, tơmeăm khoăng ƀă hlâ rong ‘na kuăn mơngế, chiâng tơdjâk troh tơdroăng rêh kâ ối dêi kuăn pơlê ƀă mâu tơdroăng cheăng kâ rêh ối pơlê pơla. Riân troh hâi lơ 31/12/2025, kong mê khía mơnot têa kân lân lu hiăng pro 484 ngế hlâ, hía, 811 ngế tro rong. Tâi tâng kế tơmeăm ki tro tơ’nhiê tiô riân cho lối 104.733 rơtal liăn.

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên ki vâ pơkâ pêi cho rak vế tơniăn, châ chăn, tơdroăng rêh kâ ối dêi kuăn pơlê cho tơdroăng ki kal khât, cho ki hdrối; rak vế tơmeăm dêi tơnêi têa, kuăn pơlê tro má môi; xo kuăn pơlê cho tơdroăng ki kal, ki tâi tâng tung hbrâ ví ƀă kong mê khía mơhot têa kân lân lu; hbrâ ví tro ƀă pêi pro 2 tơdroăng pơkâ pêi 100 hơnăm ƀă mơnhông cheăng kâ rĕng, krá tơniăn ƀă veăng thăm mơnhông 2 kơxô̆.

Pêi pro túa pơkâ “Hbrâ ví - Tối tơbleăng tơdrăng tro – Tối tơbleăng tơtro – Hbrâ ví teăm pêi pro tơdrêng”, Ngế pro xiâm hnê ngăn tơnêi têa pơkâ thế rêm râ, mâu kơvâ cheăng, mâu kong pơlê tung mâu tơdroăng rak vế châ chăn dêi kuăn pơlê cho tơdroăng kal pêi hdrối, pôi tá tơngôu, pôi tá kơdrâ; hbrâ ví vâ kơdroh iâ mâu kế tơmeăm tro tơ’nhiê, kuăn mơngế tro hlâ rong; tâi tâng xua pơkâ pêi kal má môi cho tơniăn ƀă hơniâp lĕm ăm kuăn pơlê.