Pơkâ kơxô̆ 79 - NQ/TW hâi lơ 06/01/2026 dêi Khu xiâm ngăn cheăng kal kí hdró hvêa chêng prôk pơhlêh tung túa tơmiât mơnhông cheăng kâ tơnêi têa: Sap ing hnoăng cheăng “râng krá, tŭm têk” ngi hnoăng cheăng mơjiâng pro, pơkuâ djâ ƀă po troăng ăm thăm mơnhông ki rơkê plĕng, tung tơrŭm cheăng tŏng gum dêi rơpó ƀă tơrŭm dêi rơpó ƀă kơpong cheăng kâ krê.

Tung pơla mê, Pơkâ kơxô̆ 80 - NQ/TW, hâi lơ 07/01/2026 dêi Khu xiâm ngăn cheăng kal kí ‘na mơnhông túa lĕm tro cho môi tơdroăng pơkâ ki ai pơxúa kal khât tung pơla dế kố; pơkâ mơnhông túa lĕm tro tung pơla tơrŭm cheăng ƀă kong têa ê, mê cho tơdroăng hbrâ rơnáu tơrŭm cheăng. Tơdroăng ki nếo a Pơkâ 80 cho châ xúa tâi tâng ƀă tơdroăng ki rơkê plĕng ƀă mơnhông túa lĕm tro. Rôh apoăng túa lĕm tro châ pơkâ tung tơrŭm cheăng krá tơniăn ƀă cheăng kâ, kơchơ mơdró ƀă mâu kơvâ cheăng kơmăi kơmok túa lĕm tro, ngăn tơmeăm khoăng túa lĕm tro cho môi tơdroăng mơnhông ƀă cho tơdroăng ki kal dêi ivá rơdêi dêi tơnêi têa.

Tơpui hnê mơhno a rôh hôp, pôa Tô Lâm, Kăn xiâm pơkuâ hnê ngăn Đảng ăm ‘nâi, péa Tơdroăng pơkâ nếo châ mơjiâng tung tơdroăng mơgêi trâu rơdâ pêi pro tung tơdroăng ki ai khât ƀă mơnhông túa tơmiât lĭ luâ̆n tung pơla tơnêi têa mot tung hneăng mơnhông nếo, tơdrêng amê hlối tŏng gum péa tơdroăng pơkâ ai ivá krá tơniăn cho thăm mơnhông “ivá, hiâm mơno, liăn ngân” ƀă ‘mâi mơnhông hiâm mơno tơnêi têa.

Tối rơdêi, ivá khŏm mơ-eăm mơjiâng tơdroăng cheăng kâ tơniăn krê, hbrâ rơnáu xêh, kơhnâ, tơƀrê tro ƀă rôh tơrŭm cheăng kong têa trâu rơdâ ƀă mơjiâng túa lĕm tro Việt Nam rơkê plĕng, tiô túa lĕm tro hdroâng mơngế.