A rôh hôp, Hô̆i đong kuăn pơlê dêi kong pơlê Gia Lai hiăng séa ngăn, pơkâ xoăng liăn ‘no mơjiâng tơmeăm khoăng tung ton hơnăm pơla 2026-2030; ‘mâi hơ’lêh pơkâ ‘no liăn pro tơmeăm khoăng ăm tơnêi têa hơnăm 2026. Luât pơkâ mơnhông ‘na chiâk deăng, thôn pơlê, khoa hok kơmăi kômk, hngêi ối pơlê pơla, rế hên mơngế pêi cheăng ƀă kring tơniăn pơlê pơla.

Ki vâ tối, Hô̆i đong kuăn pơlê kong pơlê Gia Lai ing pơkâ tơ’nôm lối 4.700 rơtal liăn ing kơxô̆ liăn pêi lo tâk ƀă liăn ngân pơtroh ăm hơnăm 2026, mơdêk kơxô̆ liăn ‘no mơ jiâng tơmeăm khoăng hơnăm 2026 tâk troh vâ chê 18.800 rơtal liăn. Tơbleăng a rôh tối mơgêi hôp, kăn xiâm hnê ngăn Hô̆i đong kuăn pơlê dêi kong pơlê Gia Lai Rah Lan Chung pơkâ thế Vi ƀan kuăn pơlê kong pơlê Gia Lai ƀă mâu tíu pêi cheăng, kơvâ cheăng, kong pơlê thâ tơbleăng ai pơxúa tơbrê mâu pơkâ nếo châ tơbleăng, rĕng djâ hlá mơ-éa chêh pơkâ xúa tung rêh ối, pro xiâm mơnhông rĕng ƀă krá ăm Gia Lai.