Hâi lơ 19/6, Kuô̆k hô̆i pơtối hôp rôh má 2 dêi hneăng hôp má 5, Kuô̆k hô̆i hneăng 15. Tung rôh má 2 kố, Kuô̆k hô̆i hôp rêm hâi sap hâi lơ 19 troh tâi hâi lơ 24/6. Kuô̆k hô̆i  pơtối hôp tơpui ‘na 10 tơdroăng tơkêa luât, séa ngăn, têk kŏng tiâ vâ  môi tuăn tơbleăng 8 luât, 11 Pơkâ. Tung kơxo hâi lơ 19/6, ăm hnê tối a tơdroăng tơkêa luât Hngêi ối (‘mâi hơ’lêh), mâu kăn pâ thế tơdroăng pơkâ hâi khế hơnăm xúa hngêi ối tơdjuôm tiô pơkâ dêi tơdroăng vê hdró mơjiâng pro.

Pơkâ tiah mê kô pro pơxúa ăm kuăn pơlê ki xúa ối hngêi ƀă pơlê pơla. Tơdroăng mơdêk pro hngêi ối ăm kuăn pơlê vâ mung ối xuân châ hên mâu kăn tơpui tơpeăng tơtŭng thế tăng troăng ki tro má môi ăm tơdroăng pơkâ tŏng kum ‘na pro hngêi ối ăm kuăn pơlê.

Mâu kăn khê̆n kơdeăn tơdroăng chêh ‘na Luât hiăng tơmâng troh tơkâ luâ mâu tơdroăng pá tơvâ tơvân ‘na mơnhông pro hngêi ối, ‘no liăn mơjiâng pro, hngêi ối ăm kuăn pơlê, ‘na rak ngăn hngêi ối. Tiô Nguyễn Văn Hiển, Khu kăn kong pơlê Lâm Đồng tối, kal tơkŭm a tơdroăng pơkâ ki xiâm dêi tơdroăng mơdêk pro hngêi ối ăm kuăn pơlê, ai tiô púi vâ tíu ối ăm tơtro kơ kuăn pơlê, ôh tá xê thế pro tiô tơdroăng kal vâ xúa hngêi ối.