Kơxo hâi lơ 25/5, a Hngêi Kuô̆k hô̆i po hneăng hôp roh má 5, Kuô̆k hô̆i hneăng 15. Tơbleăng a rôh pơxiâm hôp, pôa Vương Đình Huệ - Kăn xiâm hnê ngăn Kuô̆k hô̆i ăm ‘nâi: Mơni tung 23 hâi pêi cheăng Kuô̆k hô̆i kô séa ngăn, pơkâ mâu tơdroăng ki kal. Tơdrêng ƀă tơdroăng mơjiâng Luât, a rôh hôp mê, Kuô̆k hô̆i séa ngăn tơbleăng 20 tơdroăng tơkêa bro ki kal.

Mê cho Troăng rơhlâ ‘no liăn mơjiâng pro troăng prôk Ing Troăng kân 27C troh troăng kân kong pơlê. 656 to kong pơlê Khánh Hòa- tơdjêp ƀă kong pơlê Lâm Đồng ƀă Ninh Thuận; ‘mâi hơ’lêh troăng rơhlâ ‘no liăn pêi tơdroăng tơkêa bro long têa Ka Pét, tơring Hàm Thuận Nam, kong pơlê Bình Thuận...

A rôh hôp mê, Kuôk hô̆i tối tơbleăng dêi Chin phuh ‘na tơdroăng tối tơ’nôm tơdroăng pêi pro pơkâ mơnhông mơdêk cheăng kâ - rêh ối ƀă liăn ngân tơnêi têa; kĭ pơkâ liăn ngân tơnêi têa hơnăm 2021. Kăn xiâm hnê ngăn Kuô̆k hô̆i tối tiah kố, mâu khế apoăng hơnăm 2023, cheăng kâ kân dêi tơnêi têa pơtối tơniăn, liăn oh tá kơnâ yă châ séa ngăn, pro tơdâng kân châ tơniăn tung rêh ối, ki pơxúa pơlê pơla rêh ối dêi kuăn pơlê tơniăn.