Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, a rôh hôp kố, Vi ƀan pơkuâ cheăng Kuô̆k hô̆i kô ăm rơkong tơpui ƀă 10 kơxop mơ-éa ƀă 01 kơxop mơéa Pơkâ tiô tối hdrối kô pơtroh a Hneăng hôp má Môi. Tơdroăng cheăng hên, tơdroăng kal ‘mêng rơnêu hên, hên tơdroăng ối tơpui tối phá dêi pó; pơkâ thế mâu ngế cheăng tung Vi ƀan pơkuâ cheăng Kuô̆k hô̆i, mâu khu xiâm, kơvâ cheăng tơkŭm pêi pro nhên mâu tơdroăng ki ối tơvâ, mâu troăng hơlâ pêi pro tŏng gum ối ai mâu túa ki rah xo, mâu tơdroăng kal pâ rơkong hnê mơhno vâ môi tuăn hdrối vâ pơtroh ăm Kuô̆k hô̆i.

Tối nhên bu ối 13 hâi nếo cho hiăng troh hâi tâ phĭu, Kăn xiâm hnê ngăn Kuô̆k hô̆i vêh tối tơdroăng hnê mơhno dêi pôa Tô Lâm, Kăn xiâm pơkuâ hnê ngăn cheăng Đảng, tơdroăng cheăng ki kal tung khế 3 kố cho athế lăm tâ phĭu pôk kăn Kuô̆k hô̆i ƀă kăn teăng mâ Hô̆i đong hnê ngăn kuăn pơlê rêm râ ƀă hbrâ rơnáu ăm hneăng hôp má môi, Kuô̆k hô̆i hneăng 16, hneăng hôp má môi dêi Hô̆i đong Hnê ngăn kuăn pơlê mâu kong pơlê ƀlêi chiâng tơniăn lĕm.