Peăng xêi hâi lơ 19/5, a pơlê kong kơdrâm Quy Nhơn, kong pơlê Bình Đinh, Khu hnê mơhno tíu xiâm Đảng tơrŭm cheăng ƀă Khu pơkuâ hnê ngăn Đảng kong pơlê Bình Định tơkŭm po Roh hop hnoăng cheăng mơnhông tăng rah mơngế rơkê kơhnâ mot đảng tung khu mơdró kâ pá kong tơnêi têa pơkuâ ối a kơpong Tơdế tơnêi têa ƀă Tây Nguyên. Jâ Trương Thị Mai, Ngế cheăng tung Khu xiâm kal kí, khu hnê mơhno xiâm dêi Đảng hiăng pơkuâ ngăn, thế tơdjâ ‘na tơdroăng hôp kố. Ing hơnăm 2020 troh hơnăm 2022, ai 16 kong pơlê, pơlê kong kân tung kơpong Tơdế tơnêi têa - Tây Nguyên hiăng rah xo 2 rơpâu 263 ngế mot đảng, cho khu ngế ki pêi cheăng tê mơdró kâ la ối pá kong cheăng dêi tơnêi têa, kơxô̆ mơngế ki mot đảng mê rế hía tâk rế hên.

Xông tơpui a roh hôp mê, jâ Trương Thị Mai vêh mơnhên, troăng hơlâ ki vâ mơnhông đảng viên tung khu mơdró kâ pá kong tơnêi têa hiăng ai sap ing chal vâi krâ roh ton nah la nôkố xuân ôí trâm hên xahpá. Jâ Trương Thị Mai pơkâ thế, tung la ngiâ kó ah, mâu kong pơlê, pơlê kong kân kal athế tŏng kum ăm khu mơdró kâ pá kong tơnêi têa pơkuâ pơtối mơnhông tơdroăng tăng rah mơngế rơkê kơhnâ mot đảng; klêi mê, pơtối tăng rah mơngế ki vâ ai troăng hơlâ hnê mơhno tối, djâ troăng.