Hâi lơ 19/5, a pơlê kong kơdrâm Quy Nhơn, kong pơlê Bình Định, Khu tơrŭm po Tơnêi têa tơrŭm ƀă Khu pơkuâ hnê ngăn Đảng Bình Định tơkŭm po Rôh hôp “Hnoăng cheăng ‘mot Đảng tung hok tro, sinh viên kơpong peăng tơdế Tơnêi têa – Tây Nguyên”. Jâ Trương Thị Mai, Ngế xiâm pơkuâ Khu Tơrŭm Tơnêi têa pơkuâ po ƀă hnê mơhno a rôh hôp.

A rôh hôp, kăn pơkuâ mâu hngêi trung đăi hok a kơpong peăng Tơdế Tơnêi têa – Tây Nguyên tối tiah kố, hnoăng cheăng ‘mot đảng viên tung hok tro, sinh viên tung pơla hdrối nah châ mâu hngêi trung tơtrŏng khât, veăng kum mơnhông ‘mot đảng viên. Laga, túa ki hnê tín chỉ tơdjâk troh hnoăng cheăng Đoân, tơdroăng hriâm tâp dêi sinh viên mê tá hâi teăm châ hlo mâu ngế ki rơkê ki nếo.

Mâu rơkong tơpui tối a Rôh hôp hiăng bro hleăng nhên tâ ‘na túa ki châ xúa ki rơkê, mâu troăng hơlâ pơkâ tơdâng tơ’mô ƀă tối tơbleăng ki rơkê ‘na túa pêi ki tro ‘ló ‘na ‘mot đảng viên tung hok tro, sinh viên. Tơpui a rôh hôp, jâ Trương Thị Mai, pơkâ thế, tung la ngiâ mâu khu pơkuâ ngăn Đảng kong pơlê, pơlê kong kơdrâm ƀă khu râ Đảng mâu hngêi trung đăi hok, hngêi trung râ má pái a kơpong peăng Tơdế Tơnêi têa – Tây Nguyên kal tơtrŏng tâ nếo hnoăng cheăng ‘mot đảng viên tung hok tro sinh viên.