A roh hôp mâu kăn teăng mâ hiăng tơpui ‘na Tơdroăng tơkêa bro Troăng prôk la ngiâ mơjiâng luât Kuô̆k hô̆i hneăng má XVI; hlá mơ-éa chêh hdrối Đề cương Tơdroăng tơkêa bro ‘’Troăng pêi cheăng ton xŏn kêi đeăng luât Việt Nam tung chal nếo’’; Tơbleăng tơdroăng cheăng ‘na tơdroăng pơkâ, troăng hơlâ, troăng pêi kân vâ pơhlêh tơtro mâu troăng hơlâ, troăng prôk la ngiâ dêi Đảng ‘na mơnhông cheăng kâ krê tiô Tơdroăng pơkâ kơxô̆ 68 dêi Khu xiâm kal kí; Tơbleăng tơdroăng cheăng ‘na tơdroăng pơkâ, troăng hơlâ, túa pêi cheăng kân vâ pơhlêh tơtro troăng hơlâ dêi Đảng ‘na tơniăn krúa lĕm kế kâ; Tơbleăng tơdroăng châ tơƀrê tơdroăng kêi đeăng mâu tơdroăng pơkâ, luât tung pơla kố nah ƀă troăng la ngiâ, hnoăng cheăng ki xiâm tung la ngiâ.

Mơgêi roh hôp, pôa Tô Lâm, Kăn xiâm pơkuâ hnê ngăn Đảng pơkâ thế mâu kơ koan pơtối hriăn plĕng, tơmâng xo tŭm rơkong tơpui dêi mâu Ngế pêi cheăng tung Khu Hnê mơhno ƀă mâu kăn teăng mâ veăng roh hôp vâ rơnêu tơtro, kêi đeăng mâu tơdroăng xiâm châ tơbleăng, tơniăn ki dâi lĕm, tơdroăng pêi cheăng tiô pơkâ.

Kăn xiâm pơkuâ hnê ngăn Đảng pơkâ, ‘na mơ-éa chêh hdrối Tơdroăng tơkêa bro Mơnhên troăng prôk la ngiâ mơjiâng luât hneăng cheăng Kuô̆k hô̆i hneăng má XVI, tung tơdroăng pêi kêi đeăng Tơdroăng tơkêa bro, kal tơtrŏng tơdroăng pơhlêh tơtro tung hơnăm 2026 mâu tơdroăng ki xiâm, kal khât dêi Mơ-éa kal Hneăng hôp kăn teăng mâ lâp tơnêi têa roh má XIV dêi Đảng.