Tiô tối tơbleăng a rôh hôp, tung pơla hdrối nah kŏng an 2 tơnêi têa hiăng tơrŭm ‘nâi nhên mâu ngế ki pro xôi ‘na pâk chik xúa trếo ma tŭi dei 2 tơnêi têa, malối cho a troăng tơkăng kong vâ mơnhên mâu troăng prôk, tơnêi tơníu, ki ôh tá tơniăn ‘na ma tŭi, ing mê mơnhên châ 4 troăng ki pơto chơ ma tŭi sap ing kơpong “Pái to kong têa” mot tung Lếo ƀă lăm troh a mâu kong pơlê ki ê dêi Lếo ƀă Việt Nam.

Rôh hôp pơla péa pâ mâu khu kăn xiâm ‘na tơrŭm hbrâ mơdât pâk chik xúa trếo ma tŭi pơla Việt Nam – Lếo

Kŏng an 2 tơnêi têa xuân hiăng tơrŭm chêh bro hồ sơ ‘na mâu troăng prôk ƀă kong pơlê ki xiâm dêi mâu ngế ki pro xôi chiâng vâ pro pơxúa vâ pơto chơ ma tŭi sap ing kơpong “pái to kong têa” mot tung kong têa Lếo mê ah tơka luâ tíu tơkăng kong ngi Việt Nam. Tung pơla tơrŭm, khu kŏng an dêi Việt Nam hiăng châ hlo, rup kroăng lối 5.300 rôh, ƀă lối 7.300 ngế ki pro xôi ‘na ma tŭi.

Mâu kăn ki veăng hôp a rôh hôp

Khu xiâm ngăn kŏng an 2 tơnêi têa pơkâ thế mâu tíu pêi cheăng ki ai tơdjâk, kŏng an mâu kong pơlê ki tơdjêp tíu tơkăng kong pơla péa tơnêi têa pơtối mơdêk tơrŭm hbrâ mơdât pâk chik xúa trếo ma tŭi; tơrŭm pơtrui ngăn, plâ ‘nhiê mâu tíu ki vâi tơkŭm ‘na ma tŭi, rak tơniăn ăm pơlê pơla a kơpong tíu tơkăng kong pơla 2 tơnêi têa.