Mơdât khât mâu tơdroăng ki veăng kum, tơdjâk tung tơdroăng bro xôi luât ‘na troăng prôk tung pêi pro tiô luât, rak vế tơniăn a troăng prôk, malối cho ƀă kăn ƀô̆, đảng viên. Kố cho tơdroăng ki pơkâ thế dêi jâ Trương Thị Mai, ngế cheăng tung Khu xiâm pơkuâ tơdroăng kal kí, kăn pơkuâ ngăn Đảng, ngế xiâm pơkuâ khu tơrŭm Tíu xiâm tơnêi têa a Rôh hôp pơkâ, tơbleăng tơdroăng pơkâ dêi Khu pơkuâ ngăn Đảng ‘na “Mơdêk tơdroăng pơkuâ dêi Đảng ƀă hnoăng cheăng rak vế tơniăn a troăng prôk tung tơdroăng nôkố”.

Tơpui mơgêi rôh hôp, jâ Trương Thị Mai pơkâ thế, kal pêi pro tơdâng tơ’mô mâu hnoăng cheăng, troăng hơlâ tung tơdroăng Pơkâ thế kố, malối cho tung hnoăng cheăng pơkuâ, hnê mơhno, pêi pro kơtăng troăng hơlâ pơkâ dêi Đảng, luât dêi Tơnêi têa. Tơdrêng amê hlối pơkâ thế kăn ƀô̆, đảng viên athế mơdêk hiâm mơno pôu râng dêi hnoăng cheăng ƀă djâ troăng ahdrối ƀă mâu tơdroăng tơniăn a troăng prôk.