VOV4.Xơ Đăng - Mơ’nui khế 8 kố nah, Khu ngăn Droh rơtăm Việt Nam kong pơlê Dak Lak tơkŭm po rôh hôp mâu tơdroăng pói rơhêng vâ dêi khu droh rơtăm. A rôh hôp, mâu đoân viên droh rơtăm hiăng tơpui tơno tơdrăng hên tơdroăng ki ai tơdjâk troh tơdroăng pơxiâm pêi cheăng ƀă mâu tơdroăng ki kal ai tơdjâk troh vâ mơnhông tơrŭm đoân, hô̆i, tơrŭm droh rơtăm.

A rôh hôp, mâu đoân viên droh rơtăm hiăng tơpui tơno hên tơdroăng ki kal môi tiah: tơpui tối ăm dêi rơpó túa pêi pro ki ‘ló, túa pêi ki tơƀrê, tơmiât rơkê dêi droh rơtăm a rêm tơring, cheăm, tíu pêi cheăng veăng kum koh tơdah ƀlêi trâng Hneăng hôp Đoân rêm râ. Tối ‘na tơdroăng ki châ hlo ƀă mơhno tối tơdroăng ki rơhêng vâ, loi tơngah dêi droh rơtăm hdrối, tung ƀă klêi kơ’nâi Hneăng hôp Đoân rêm râ ƀă hdrối rôh vâ po Hneăng hôp Đoân lâp kong pơlê ƀă lâp tơnêi têa rôh má 12, hneăng hơnăm 2022 – 2027.

Tối ‘na mâu tơdroăng tơmiât krê ‘na tơdroăng cheăng, hnoăng cheăng pôu râng dêi droh rơtăm tung chal nếo.

Mâu kăn tối: tung pơla hdrối nah, tơdroăng ki tơkŭm mâu đoân, hô̆i a mâu tơring cheăm hiăng châ tơmâng ngăn khât, tơkŭm đoân hiăng mơhno tối ‘na hnoăng cheăng tung mâu tơdroăng cheăng, tơdroăng tơ’noăng a tơring cheăm, mơhno tối tơdroăng ki châ djâ troăng ahdrối, mơhnŏng pleăng dêi hnoăng cheăng dêi hơnăm ối nếo. Laga, ai mâu tơring cheăm ki ‘nâ, tơdroăng tơrŭm, tơkŭm mâu droh rơtăm xuân tá hâi hlo tơƀrê, hnoăng cheăng đoân tá hâi kơhnâ, tá hâi mơdêk tâi ki tơƀrê vâ tơ’mot, tơkŭm mâu droh rơtăm veăng pêi pro.

Mâu kăn tơpui tơno a rôh hôp

Ngoh Nguyễn Văn Thành, a thôn 7, cheăm Ea Kiết, tơring Čư̆ Mgar tối tơdroăng ki ai khât:

“Mâu đoàn viên droh rơtăm tung thôn mâu ngế ki hiăng hên hơnăm vâi hiăng ôh tá vâ veăng xếo tung tơdroăng cheăng đoân, ƀă mâu ngế ki ối tung hơnăm đoân cho mâu hok tro mê ai mâu vâi o veăng la á krếo thế vâi veăng gá xơpá khât. Nôkố krếo thế mâu vâi o ing loa rơ’jíu lơ Facebook, mê nếo á troh trâm mâu vâi o mê vâi xuân ro la veăng ôh ti hên”.

Hlo ‘na tơdroăng ki ai khât kố, hên đoân viên xuân tối túa pêi ki tơƀrê a tíu pêi cheăng dêi tơná. Tiah mê, vâ tơdroăng ki tơrŭm, tơkŭm droh rơtăm châ tơƀrê mê kal ‘nâi nhên hiâm mơno, tơdroăng loi tơngah dêi đoân viên droh rơtăm, hlê vâi vâ klâi ƀă kal klâi drêng veăng tung khu tơrŭm đoân, hô̆i. Ki khât, nôkố xua cheăng kâ, khu đoân viên droh rơtăm vâi lăm pêi cheăng hơngế xuân tơdjâk hên troh tơdroăng tơrŭm tơkŭm droh rơtăm lơ mơnhông tơdroăng tơ’noăng đoân hô̆i a mâu tơring cheăm tíu kuăn pơlê rêh ối.

Xua mê, hên ngế tối, vâ tơrŭm tơkŭm droh rơtăm, kal pêi pro ƀă tơdroăng đoân ƀă mâu tơdroăng pơxiâm vâ pêi cheăng ƀă mơnhông mơdêk cheăng kâ a tơring cheăm. Ngoh Lê Công Nhận, a thôn Tân Tiến, cheăm Ea Na, tơring Krông Ana tối tơdroăng tơmiât dêi tơná:

“Vâ tơdroăng tơ’noăng droh rơtăm a tơring cheăm mơnhông rơdêi mê pin athế mơnhông tơdroăng ki pơxiâm vâ pêi cheăng, pro tiah lâi ki droh rơtăm athế ối vâ mơjiâng pơlê cheăm, mơnhông cheăng kâ a tơring cheăm tâk troh a tơdroăng nếo châ tiah mê ‘nôi tơdroăng tơ’noăng nếo rơdêi. Vâ mơnhông mơdêk cheăng kâ, pin athế ai mâu túa pơkâ rêm tơring cheăm pin athế kum tung môi ngế krê, tŏng kum vâi ƀlêi chiâng mê vâi kô tơdjâk tơdroăng ki mê ăm mâu đoân viên droh rơtăm ki ê, ing mê nếo pro chiâng tơdroăng tơ’noăng ‘na cheăng kâ”.

H’Xíu H’Mok chêh

Katarina Nga tơplôu ƀă tơbleăng