Kơxo lơ 28/6, a Pơlê kong xiâm Bắc Kinh, pôa Phạm Minh Chính, Ngế pro xiâm hnê ngăn Chin phuh veăng hôp a Rôh hôp Tơrŭm mơ’no liăn cheăng ƀă tê mơdró Việt nam – Sinuâ xua Hô̆i đong Pơkâ mơdêk tê mơdró kong têa Sinuâ ƀă Khu xiâm pơlâ ƀă ‘No liăn cheăng Việt Nam tơkŭm po. Tơpui a rôh po hôp, pôa Phạm Minh Chính, Ngế pro xiâm hnê ngăn tơnêi têa tối nhên, pin hiăng châ tâng ai mâu rơkong tơpui tối trâu rơdâ, tro ƀă tơdroăng ki ai khât ƀă pơkâ mơ’no, pâ thế dêi kăn teăng mâ khu mơdró kâ, khu ‘no liăn cheăng.

Malối, hiăng châ tâng pôa Lưu Quốc Trung, Ngế pro xiâm phŏ hnê ngăn kong têa Sinuâ tơpui, tung mê, mơ’no tối troăng pơkâ, troăng hơlâ mơdêk tơrŭm tê mơdró, ‘no liăn cheăng pơla péa tơnêi têa. Ngế pro xiâm hnê ngăn tơnêi têa pơkâ thế mâu khu xiâm: Túa pơkâ ƀă ‘no liăn cheăng, Khu cheăng ƀă kơmăi kơmok ƀă tê mơdró ƀă mâu kơ koan ki ai tơdjâk dêi Việt Nam rĕng chêh tơkŭm, tơmâng xo mâu rơkong tơpui tối ki tơtro, pêi pro klêi mâu tơdroăng pơkâ, luât, hơ’lêh tơdroăng ‘no liăn cheăng tê mơdró; tơdrêng amê, hlối pơkâ thế mâu khu xiâm, kơvâ cheăng, kơ koan ki ai tơdjâk troh péa tơnêi têa rĕng séa ngăn, pêi pro klêi mâu tơdroăng tơkêa, tơdroăng tơrŭm cheăng vâ bro tơ’lêi hlâu ăm khu mơdró kâ tối tơdjuôm, tung mê ai khu mơdró kâ Sinuâ.