Hâi lơ 25/3, ai lối 550 ngế kuăn pơlê a bêng La Gi ƀă cheăm Tân Hải, kong pơlê Lâm Đồng hiăng veăng roh tơleăng ki ôh tá xê khât pơtâng tối hbrâ mơdât tơnăng ká xi xŏng ôh tá tro luât, ôh tá tối tơbleăng ƀă ôh tá tiô pơkâ IUU.

Tơdroăng xua Chi đô̆i Séa tơdroăng tơnăng ká xi xŏng kơxô̆ 4, Khu xiâm pơkuâ lêng Kơpong Kan sat gâk kring têa kơxĭ 3 tơrŭm ƀă Khu pơtâng tối ƀă Mơhnhôk kuăn pơlê dêi khu kăn pơkuâ hnê ngăn Đảng ủi, Hngêi tơleăng kuăn pơlê kong pơlê tơkŭm po. Roh tơleăng châ mơjiâng ing tơdroăng ki ai khât dêi roh tơleăng xôi kân tơdjâk troh tơdroăng pêi cheăng pro xôi “Tơkŭm po ăm mơngế ki ê mot a kong têa ê ôh tá tro luât” ƀă “Pro ôh tá tơniăn tơdroăng pêi cheăng dêi kế tơmeăm khoăng điê̆n tưh’’.

Ing tơdroăng vêh mơhno troăng séa ngăn, săm tối, tơleăng, tơdroăng gum kuăn pơlê tơnăng ká xi xŏng tơ’lêi plĕng, tơ’lêi châ achê mâu pơkâ luât ‘na tơnăng ká xi xŏng. Hên tơdroăng xiâm ki kal châ tối rơdêi pơkâ ‘na kơpong tơnăng ká xi xŏng, pơkuâ tuk ká, tơdroăng pro xôi IUU kô tro pơxâu phâk xua xôi kân, xuân môi tiah mâu tơdroăng pro xôi môi tiah tah, tơpâ kơmăi ki séa ngăn troăng prôk.