Klêi tơmâng mâu tíu pêi cheăng dêi Rơ’jíu xiâm Việt Nam tơbleăng ki tơƀrê tung tơbleăng pêi mâu tơdroăng hbrâ hneăng Tơ’noăng roh má mơ’nui tung rơ’jíu lâp tơnêi têa má 17, tơbleăng mơgêi rôh pêi cheăng, pôa Phạm Mạnh Hùng, Phŏ xiâm ngăn Rơ’jíu xiâm Việt Nam, Ngế pơkuâ Tơkŭm po Tơ’noăng mơ’no tung rơ’jíu lâp tơnêi têa loi khât, ƀă tơdroăng tơkŭm nhên tro, hneăng tơ’noăng rôh kố kô hdró ki mơnhông tơƀrê dêi tơdroăng tơpui mơ’no tung rơ’jíu lâp tơnêi têa ƀă mâu ngế chêh hlá tơbeăng, mâu ngế rah chêh hlá tơbeăng, kih thuât viên kô hbrâ rơnáu rơtế ƀă mâu hdroâng kuăn ngo pêi mâu tơdroăng cheăng pơcháu mơnhông tơnêi têa tung mâu hơnăm la ngiâ.

Mâu ƀai chêh mâu tơdroăng pơtroh tơ’noăng ai hên túa dêi hlá tơbeăng mơ’no tung rơ’jíu mê cho” Tơdroăng tơpui mơ’no tơdrêng; mơnhên rơdâ, mơnhên rơdâ tí tăng ngăn, tơdroăng chuyên đề, tơdroăng tơpui ƀă nâl kuăn ngo. Malối, hneăng tơ’noăng rôh kố cho rôh apoăng, Rơ’jíu xiâm Việt Nam djâ ‘mot tơ’noăng túa pro Podcast - túa hlá tơbeăng ai idrâp dế hlo pro hên rơdêi ‘na tơdroăng cheăng ƀă kơxô̆; tơkŭm po Hôp lâp plâi tơnêi ƀă Leh pơxiâm po ƀă Tơdroăng mơđah hơdruê xuăng “Thanh âm kỷ nguyên mới”  po a Plông kân lơ 30/10, bêng Hạ Long veăng mơđah mê ai hên mâu ngê̆ sih, ca sih ki vâi ô eăng ƀă chât rơpâu ngế ngăn.