Kong pơlê Dak Lak pơxiâm mơjiâng pro Hngêi trung Phôh thong ai tíu kâ koi ối pơtê tơdjêp râ Râ má môi – Râ má péa cheăm Ea Bung. Hngêi trung ai tâi tâng kơlo liăn mơ’no 250 rơtal liăn ing kơxô̆ liăn Tơnêi têa ƀă kong pơlê kô tơxâng tơdroăng kal vâ hriâm tâp, ối pơtê dêi lối 1.300 hok tro cho mâu vâi o kuăn pơlê hdroâng kuăn ngo kơpong tơkăng kong.

Cheăm Ea Ƀung châ mơjiâng ing tơmot chiâng môi ing Ea Ƀung ƀă Ya Tờ Mốt (ton), kơpong kân rơdâ, kuăn pơlê rêh ối u tâi utá, tơdroăng prôk lăm hriâm tâp dêi hok tro, ki má lối a rơnó mêi, ối hên pá puât. Tơdroăng mơ’no liăn cheăng pro hngêi trung ai tíu kâ koi ối pơtê tơdjêp 2 râ châ pói tơngah pro pơhlêh tung mơdêk ki dâi lĕm hnê hriâm kơpong tơkăng kong.

Kong pơlê Lâm Đồng tơkŭm po pơxiâm pro 3 to hngêi trung pơtối râ a mâu cheăm tơkăng kong Tuy Đức, Thuận Hạnh ƀă Dak Wil. Pái to hngêi trung mê ai tâi tâng kơxô̆ liăn ‘no mơjiâng pro dâng 675 rơtal liăn.

Túa pro râ má 3, ƀă mâu hngêi mê xŏn xap 1-3 râ. Khế hơnăm mơjiâng pro sap khế 3/2026 troh khế 8/2027. Drêng hiăng pro kêi ah kô pro leh hiăng klêi, mâu hngêi trung kô tơdah lối 4.000 ngế hok tro hriâm sap ing râ má Môi troh râ má Péa hnê ăm mâu kuăn ngo tung kơpong.

Kong pơlê Quảng Ngãi tơkŭm po leh pơxiâm mơjiâng pro, po tơnêi mơjiâng pro Hngêi trung Phôh thong ai tíu kâ koi ối pơtê tơdjêp râ Râ má  môi – Râ má péa a 5 cheăm tơkăng kong, mê cho: Bờ Y, Ia Tơi, Ia Đal, Đăk Long và Đăk Plô. Tâi tâng kơlo liăn mơ’no mơjiâng pro 5 hngêi trung cho lối 1.100 rơtal liăn. Rêm hngêi trung châ mơjiâng tung ƀăng 5 hectar, kân sap ing 700 troh 1.600 hok tro, tơtro ƀă rêm pơlê.

Mâu tơdroăng tơkêa bro châ pêi pro tiô troăng hngêi trung ai tíu kâ koi ối pơtê tơdjêp râ Râ má  môi – Râ má péa, hlối vêh bro rế lĕm hngêi trung hriâm, kơdroh mâu hngêi trung tơprâ tơprŭng ukố umê, mơjiâng mâu hngêi trung tơkŭm. Lâp kong pơlê Quảng Ngãi châ mơ’no mơjiâng 9 hngêi trung phôh thong tơdjêp râ Râ má môi – Râ má péa a mâu cheăm tơkăng kong. Hneăng má 1, kong pơlê hiăng pêi pro mơjiâng 4 hngêi trung a mâu cheăm Rờ Kơi, Mô Rai, Sa Loong ƀă Dục Nông, tiô tối hdrối kêi đeăng khế 7/2026. Tŭm 5 tơdroăng tơkêa bro châ mơjiâng pro tung hneăng má 2 kố, tiô tối hdrối kô pêi kêi đeăng a khế 8/2027.