A cheăm tơkăng kong Ia Pnôn, Khu pơkuâ Mố đô̆i gâk tơkăng kong, kong pơlê Gia Lai tơkŭm po tơdroăng “Khế Pái Droh rơtăm – Khế Pái tơkăng kong” ƀă hên tơdroăng pêi pro ai pơxúa môi tiah diâp troăng krâ pul on bâ eăng, tơkŭm po tơdroăng ki xah hêi ăm hok tro.

Ing tơdroăng ki tiâ 20 rơkong kơ-êng a rôh tơ’noăng “Kơ’ngrâu kơ’lêng mêa”, hok tro Hngêi trung râ má môi ƀă râ má péa Lương Thế Vinh, cheăm Ia Pnôn, kong pơlê Gia Lai hiăng hlê nhên tâ ‘na tíu tơkăng kong tơnêi têa, Luât tơkăng kong Việt Nam xuân môi tiah hnoăng cheăng dêi khu Mố đô̆i gâk tơkăng kong. Ing mê, mơdêk ki hlê plĕng ‘na luât, hnê tơ’nôm hiâm mơno pâ nhuô̆m tơnêi têa ƀă hiâm mơno pôu râng tung rak vế hnoăng pơkuâ tơnêi tơníu sap ing ối ‘nân a tăng hngêi trung.

Tung rôh po tơdroăng, Khu pơkuâ Mố đô̆i gâk tíu tơkăng kong, kong pơlê Gia Lai hiăng diâp ăm vâi krâ nhŏng o pơlê Triêl môi to troăng krâ pul on ăm bâ eăng kơpong tơkăng kong kơnâ lối 75 rơtih liăn; diâp 50 kơxuô tơmeăm ăm mâu vâi o hok tro ki ai tơdroăng rêh ối xơpá. O Rơ Lan H’Hương, hok tro lâm 9, Hngêi trung Râ má môi ƀă Râ má péa Lương Thế Vinh tối:

“Á ro khât xua châ veăng tung tơdroăng Khế Pái Droh rơtăm – Khế Pái tơkăng kong” ƀă châ tăng ‘nâi ‘na tơkăng kong tơnêi têa ƀă Luât Tơkăng kong Việt Nam. Á kô mơ-eăm hriâm tâp ăm rơkê vâ mơhno hiâm mơno pâ nhuô̆m tơnêi têa dêi mâu rơxông hơnăm ối nếo ngin o”.

Rơtế amê, a Dak Lak, Mố đô̆i gâk tơkăng kong dêi kong pơlê tơkŭm po hôp tơpui tơno dó inâi “Droh rơtăm Mố đô̆i gâk tơkăng kong, kong pơlê Dak Lak krá rơdêi loi tiô Đảng”, hlối khĕn kơdeăn mâu ngế hơnăm ối nếo ki kơhnâ rơkê, tơdroăng tơngah pêi a hơnăm 2025. A rôh leh, kăn ƀô̆, đoân viên droh rơtăm pleăng reăng a Um meăn Pôa Hồ ƀă Mố đô̆i gâk tíu tơkăng kong, mơhno hiâm mơno pâ mơnê Pôa Hồ Chí Minh, hlối tối mơnhên khŏm mơ-eăm pơtối hriâm tâp, pêi tiô hiâm mơno túa rêh ối dêi Pôa, mơnhông khôi hmâ dêi khu lêng mố đô̆i.

A rôh tơpui tơno, mâu kăn hiăng tơno tơnêng hên tơdroăng ki rơkê plĕng, túa pêi ki rơkê, pơtối tối rơdêi hnoăng cheăng djâ troăng ahdrối, tơmiât pêi rơkê dêi mâu ngế hơnăm ối nếo tung pêi pro hnoăng cheăng pơkuâ ngăn, rak vế hnoăng pơkuâ tíu tơkăng kong. Rôh kố, tíu pêi cheăng khĕn kơdeăn 10 ngế “Cho mâu ngế hơnăm ối nếo kơhnâ rơkê”, 7 ngế “cho mâu ngế ki châ loi tơngah tung la ngiâ” hơnăm 2025, ƀă hlối khĕn kơdeăn 1 khu pú hên ƀă 2 ngế krê ki kơhnâ rơkê. Đăi tă Đỗ Quang Thấm, Kăn pơkuâ hnê ngăn Đảng Khu pơkuâ Mố đô̆i gâk tơkăng kong, kong pơlê Dak Lak tối nhên:

“Tơdroăng cheăng pơkuâ ngăn rak vế hnoăng tơnêi tơníu gâk kring tơkăng kong tơnêi têa pâ thế rêm ngế kăn ƀô̆, mố đô̆i, malối cho khu đoân viên, droh rơtăm, kal pơtối mơ-eăm hriâm pât mơnhông tâ nếo. Pơkâ thế khu kăn pơkuâ hnê ngăn Đảng pơkuâ tíu pêi cheăng pơtối hnê mơhno pro tơ’lêi hlâu vâ đoân viên ƀă mâu tơdroăng tơrŭm tơ’noăng mơnhông krá rơdêi chiâng tơdroăng ki kal vâ hnê, hriâm pât ƀă hnê tơ’nôm ki rơkê plĕng ăm mâu rơxông hơnăm ối nếo dêi tíu pêi cheăng".

Nôkố Đoân Droh rơtăm Mố đô̆i gâk tíu tơkăng kong, kong pơlê Dak Lak ai 19 khu tơrŭm cheăng Đoân. Mâu ngế hơnăm ối nếo dêi mâu tíu pêi cheăng kơhnâ tơrŭm ƀă cheăm bêng pêi pro mâu tơdroăng cheăng tŏng gum rêh ối pơlê pơla, mơjiâng thôn pơlê nếo, tŏng gum Kuăn pơlê kơpong tơkăng kong ing mâu túa pơkâ pêi môi tiah “Mơdêk chêng o troh hngêi trung – Kuăn roăng Đông mố đô̆i gâk tơkăng kong”, “Thái hnê chư krâ kơlŏng drêh”, ATM têa krúa tíu tơkăng kong”, “Bâ eăng kơpong tơkăng kong” ƀă hên ki ê.

Rôh kố, Khu hnê ngăn Đoân Dak Lak hiăng tơkŭm po Leh tơbâ 95 hơnăm Hâi mơjiâng Đoân Droh rơtăm Kŏng san Hồ Chí Minh ƀă inâi “Hơnăm ối nếo mâu hdroâng kuăn ngo Dak Lak – Púi rơhêng vâ mơ-eăm tơná rơtế ƀă tơnêi têa”, tơdrêng amê hlối khĕn kơdeăn 56 ngế ki kơhnâ rơkê pơla hơnăm 2020 - 2025. Teăng mâ mâu kăn ƀô̆ Đoân ƀă mâu phô̆m vâ xông kân veăng trâm mâ tơpui tơno dó inâi “Hơnăm ối nếo mâu hdroâng kuăn ngo Dak Lak – Púi rơhêng vâ mơ-eăm tơná rơtế ƀă tơnêi têa”, veăng pro tơdjâk hiâm mơno pơtó khôi hmâ, mơnhông hnoăng cheăng pôu râng ƀă tơdroăng rơhêng vâ pleăng.

Rôh kố, Khu pơkuâ ngăn Đoân khĕn kơdeăn 56 khu pú hên, ngế krê ki kơhnâ rơkê; diâp Pri Lý Tự Trọng hơnăm 2026 ăm nâ Lê Hiếu Vy, kăn pơkuâ ngăn Đoân Hngêi trung phôh thong Ngô Gia Tự. Ngoh Lương Minh Tùng, kăn pơkuâ ngăn Đoân kong pơlê Dak Lak tối rơdêi:

“Kố cho rôh hôp cheăng kal kí ki kal dêi khu tơrŭm ngăn ‘na cheăng Đoân, vâ mâu vâi pú phô̆m vâ xông kân, vâi hdrêng ngăn tiô ƀối mâu nâ mâu ngoh ki prôk hdrối, pêi pro tro hnoăng cheăng dêi tơná, mơ-eăm châ mot tung Đoân; tơdrêng amê hlối ‘mâi mơnhông khu tơrŭm Đoân, veăng mơjiâng Đảng, kăn pơkuâ rế hía rế krá rơdêi”.

Mâu tơdroăng pêi pro ki kơhnâ rơkê, ai pơxúa tung Khế Droh rơtăm hơnăm kố ôh ti xê to mơhno nhên hnoăng cheăng djâ troăng ahdrối, hiâm mơno vâ pleăng dêi mâu ngế hơnăm ối nếo mâu hdroâng kuăn ngo Tây Nguyên, mê ối veăng gum tơbêng túa pêi pro ki tro ‘ló kăch măng, tơbêng hiâm mơno pâ nhuô̆m tơnêi têa, pôu râng hnoăng ƀă pơlê pơla, tơdjuôm kŏng mơjiâng bă rak vế krá rơdêi hnoăng pơkuâ tíu tơkăng kong tơnêi têa tung tơdroăng nếo.