VOV4.Xơ Đăng - Pêi pro tiô tơdroăng mơhnhôk ‘’Hơnăm ối nếo hriâm ƀă pêi pro tiô hiâm mơno, troăng tơdjâ,  túa pêi cheăng dêi Hồ Chí Minh’’ a rêm tơdroăng cheăng dêi tơná, đoân viên droh rơtăm Dak Lak đi đo mơ-eăm hriâm, vâ pơxúa ăm tơná ƀă hriâm ing Pôa Hồ tung rêm kơvâ cheăng pêi rêm hâi.

Cho kăn ƀô̆ Đoân Droh rơtăm a cheăm kơpong đông kăch măng, ngoh Đỗ Hữu Phong, Kăn phŏ pơkuâ hnê ngăn Đoân cheăm Čư̆ Pui, tơring Krông Bông, kong pơlê Dak Lak đi đo tơmiât pro ti lâi vâ pêi kêi đeăng lĕm hnoăng cheăng châ pơcháu, rŭm môi tuăn, tơkŭm droh rơtăm rơtế veăng mơnhông mơdêk cheăng kâ, mơjiâng thôn pơlê rế hía rế rơkê. Ngoh Phong tối: ngoh mơ-eăm hriâm tiô Pôa Hồ tơdroăng ki djâ troăng hdrối, ‘’tơpui thế pêi’’. Xua mê, tung hên hơnăm, ôh tá xê to hâk veăng tơdroăng pêi cheăng Đoân, ngoh ối thăm veăng pêi hên tung mơnhông mơdêk cheăng kâ rơpŏng, rế păn chu, rế pêt hên hdrê loăng plâi kâ vâ mơdêk pêi lo liăn.

Tơdroăng hriâm ƀă pêi tiô Pôa châ rơxông ối nếo Dak Lak mơhno ƀă mâu tơdroăng pêi ki nhên

Xo vế túa ki rơkê tơtro dêi tơná vâ tơbleăng tối ăm ƀă mâu đoân viên droh rơtăm ki ê, ngoh xuân tơmâng troh mâu droh rơtăm ối tung rơpŏng pá puât, rơpŏng ai hnoăng tơnêi têa, rơpŏng xahpá ‘na kih thuât, tơdjêp tơrŭm  mâu kơxô̆ liăn mung kơjo kum vâi mơnhông mơdêk pêt mơjiâng tơmeăm.

Ngoh Đỗ Hữu Phong hơ’muăn:

“Tơná xuân ‘nâi hên ing tơdroăng pêi cheăng Đoân, ing pơtâp ivá mê xuân mơjiâng mâu tơdroăng xah hêi ăm đoân viên, droh rơtăm tung pơlê. Ƀă ki apoăng mê á xuân thế cho ngế djâ troăng ahdrối tung tơdroăng pơ’lêh hdrê pêt vâ mơnhông mơdêk cheăng kâ, vâ ăm đoân viên hriâm tâp ƀối’’.

Ƀok thái pơkeăng Đỗ Thị Thanh Trang (peăng hơ’vá) veăng pleăng hnoăng cheăng khăm pơlât ăm kuăn pơlê kơpong pá puât

Ƀă nâ Đỗ Thị Thanh Trang, ƀok thái pơkeăng hơnăm ối nếo dế pêi cheăng a Tíu xiâm khăm pơlât tơring Čư̆ Mgar, tơdroăng hriâm ƀă pêi tiô rơkong Pôa Hồ châ pêi pro tung tơdroăng pêi cheăng rêm hâi. Ƀă hnoăng ‘’ƀok thái pơkeăng rơkê môi tiah ngế nôu’’, nâ đi đo mơ-eăm rak ngăn ivá ăm mơngế châi tamo. Ôh tá xê to kơhnâ tung hnoăng cheăng, nâ Trang ối thăm mơ-eăm hên tung mâu tơdroăng cheăng xua pơlê pơla. Nâ nôkố cho Kăn pơkuâ hnê ngăn cheăng Đoân ‘na khăm pơlât dêi tơring, ngế pêi cheăng tung Chi hô̆i ƀok thái pơkeăng hơnăm ối nếo dêi tơring. Mơhé hâi pêi cheăng tơvâ tơvân, nâ xuân hbrâ chôu phut vâ veăng tung mâu roh lăm pêi cheăng a cheăm, pơlê, khăm pơlât, xing xoăng pơkeăng tê kơtê ăm vâi krâ kuăn pơlê a mâu pơlê kơpong hơhngế hơhngo.

Nâ Đỗ Thị Thanh Trang hơ’muăn:

“Á o ‘na tơdroăng pêi cheăng a kơ koan châ 10 hơnăm mê rêm hơnăm mê Chi hô̆i ƀok thái pơkeăng hơnăm ối nếo tơring Čư̆ Mgar tơkŭm po ki vâ iâ 2 – 3 roh troh khăm pơlât pơlê pơla a mâu pơlê kơpong hơhngế hơhngo. Mê tâi tâng mâu roh á pơrá reăng. Á tâ phiu ro drêng tơná ối tung kơvâ khăm pơlât ƀă tơdroăng hriâm tâp ƀă pêi tiô troăng tơdjâ hiâm mơno Pôa Hồ Chí Minh, mê châ á xúa rêm hâi tung tơdroăng á lăm khăm pơlât lơ rak ngăn mâu ngế tamo châi xuân môi tiah tơdroăng mê đi đo hriâm tâp, mơdêk tơdroăng ki rơkê tung tơdroăng pêi cheăng, pro ti lâi vâ rế hía rế pêi chiâng lĕm tơdroăng ki pói vâ dêi mơngế châi tamo’’.

Ngoh Đỗ Hữu Phong (peăng hơ’ếo) pêi kơhnâ tá hiâm mơno, djâ troăng ahdrối ‘’tối hlối pêi’’ tung mâu tơdroăng pêi cheăng Đoân

Pêi pro Pơkâ kơxô̆ 05 dêi Khu xiâm kal kí ‘na pơtối thăm pêi pro rơdêi tơdroăng hriâm tâp, pêi tiô troăng tơdjâ, hiâm mơno Pôa Hồ Chí Minh, tung pơla kố nah, mâu tíu pêi cheăng Đoân Droh rơtăm a Dak Lak hiăng pêi pro ƀă hên tơdroăng pêi cheăng ki pơxúa. Mâu tơdroăng môi tiah: ‘’Pleăng hnoăng cheăng rơnó hngíu’’, “Rơnó Hơngui pleăng hnoăng cheăng’’, ‘’Kum hok tro troh hngêi trung’’, ‘’Ƀok thái pơkeăng hơnăm ối nếo pêi tiô rơkong Pôa Hồ, pleăng hnoăng cheăng kum rak ngăn ivá pơlê pơla’’, ‘’Hâi leh tơbleăng á nhuô̆m pâ tơnêi têa á’’ châ pêi pro tơƀrê, rak rêm hơnăm hiăng mơhnhôk kơdrâm đoân viên droh rơtăm veăng pêi.

Tơdroăng pơtâng tối ‘na pêi châ pêi pro trâu hơngế. A mâu tíu hiăng tơkŭm po hên roh tơ’noăng ti tăng plĕng ‘na hiâm mơno, troăng tơdjâ Hồ Chí Minh. Mâu ‘’kơtuh kơxop hlá mơ-éa Pôa Hồ’’ châ mơjiâng vâ kum đoân viên droh rơtăm ƀă hok tro ai tơ’nôm kơxop mơ-éa ti tăng plĕng ‘na tơdroăng rêh ối,  tơdroăng rêh ối châ hên ngế ô eăng dêi Pôa ƀă tơdroăng cheăng dêi Pôa. Ing mê hlo ai mâu ngế ki kơhnâ rơkê tung tơdroăng hriâm tâp ƀă pêi tiô rơkong Pôa.

Nâ Phan Thị Trinh, Kăn phŏ pơkuâ hnê ngăn Đoân Droh rơtăm kong pơlê Dak Lak mơnhên, ing tơdroăng hriâm tâp ƀă pêi tiô Pôa hiăng chiâng tơdroăng cheăng pêi đi đo, châ troh mâu đoân viên droh rơtăm tung kong pơlê.

“Tơdroăng tơkŭm po mâu tơdroăng tơ’noăng ƀă tơdroăng hriâm tâp ƀă pêi tiô troăng tơdjâ hiâm mơno Pôa Hồ Chí Minh vâ pêi pro mâu tơdroăng xiâm, mâu tơdroăng cheăng kăch măng. Ai hên tơdroăng xiâm, tơdroăng pêi cheăng châ mâu nhŏng o tíu pêi cheăng tơkŭm po, veăng hnê mơhno, pêi pro châ tơƀrê vâ ăm mâu tơdroăng pêi cheăng, tơdroăng pêi rế hía rế mơnhông mơdêk tâ’’.

Ƀă tơdroăng pơtâng tối trâu hơngế, đi đo, tơdroăng ‘’Hriâm tâp ƀă pêi tiô Pôa’’ hiăng kum mâu đoân viên droh rơtăm, hok tro a Dak Lak hlê plĕng trâu hơngế tâ ‘na mâu tơdroăng xiâm ƀă ki kơnâ kân kĭn dêi troăng tơmiât hiâm mơno, troăng tơdjâ Pôa Hồ Chí Minh. Ing mê mơjiâng tơdroăng ki pơ’lêh ó rơdêi tung pơtâp, uăn pât, hriâm tâp ƀă pêi tiô mâu tơdroăng Pôa Hồ hnê ing mâu tơdroăng pêi ki nhên, pơxúa rêm hâi.

H’Xíu H’Mok/VOV Tây Nguyên/Tơplôu: A Sa Ly