VOV4.Xơ Đăng - Kơmăng lơ 24/7, Khu pơkuâ cheăng Đoân kong pơlê Kon Tum tơkŭm po leh ‘’Tĕk  on pâ mơnê mâu Ngoh khên tơnôu hlâ tung tơplâ xâ’’. Kố cho môi tung hên tơdroăng pêi dêi rơxông ối nếo Kon Tum klăng leh tơbâ 75 hơnăm Hâi mô đô̆i rong râ – Hlâ hía 27/7. Leh ‘’Tĕk on pâ mơnê mâu Ngoh khên tơnôu hlâ tung tơplâ xâ’’ châ Khu pơkuâ cheăng Đoân kong pơlê Kon Tum tơkŭm po kân krip a péa tíu ki xiâm cho Ilâng kiâ mô đô̆i hlâ tung tơplâ xâ kong pơlê ƀă Hngêi meăm pro tơbâ mô đô̆i hlâ tung tơplâ xâ Sư đoân 10 a pơlê kong kơdrâm Kon Tum.

Đoân viên pơlê kong kơdrâm Kon Tum chôu nhâng pâ mơnê mâu ngoh khên tơnôu hlâ tung tơplâ xâ

Rơtế ƀă mê a 47 tơmeăm tơbâ hnoăng mô đô̆i hlâ tung tơplâ xâ a 10 tơring, pơlê kong kơdrâm dêi kong pơlê, rơpâu đoân viên, droh rơtăm 102 cheăm, bêng, pơlê kân xuân nhuôm pâ tơkŭm po leh chôu nhâng, pleăng rơvĭu reăng ƀă rơtế tĕk lối 7.000 to on đĕng mơhno hiêm mơno pâ mơnê trâu hơhngế mâu ngoh khên tơnôu hlâ tung tơplâ xâ hiăng hlâ xua tơniăn krê, tơniăn dêi Tơnêi têa.

Rơxông ối nếo khu lêng  tĕk on pâ mơnê mâu ngoh khên tơnôu hlâ tung tơplâ xâ

 Nôkố kong pơlê Kon Tum ai 7.479 tơnâp kiâ mô đô̆i châ ‘mé a 10 ilâng kiâ mô đô̆i tung kong pơlê. 5 hơnăm hiăng hluâ mâu tíu cheăng dêi kong pơlê hiăng ti tăng chiâ xo tơkŭm châ 233 kơxêng kiâ mô đô̆i. Tâi tâng kong pơlê nôkố ai 49 tơmeăm pâ mơnê hnoăng kân kĭn mô đô̆i hlâ tung tơplâ xâ, tung mê ai 10 ilâng kiâ mô đô̆i, 36 hngêi eăm pro vâ tơbâ chêh inâi mô đô̆i hlâ tung tơplâ xâ ƀă 3 Tíu meăn tơbâ mâu mô đô̆i hlâ tung tơplâ xâ.

A Sa Ly tơplôu ƀă tơbleăng