Mâu hâi khế 4 tơdroăng ton nah, Thươ̆ng tă Nguyễn Thị Minh, cho kăn ƀô̆ kŏng an pơlê kong kân Hà Nội đi đo vêh pâ mâu hơnăm tơplâ pá puât ƀă hlâ rong hên mơngế, Thươ̆ng tă Nguyễn Thị Minh hơ’muăn: jâ châ rah xo mot kơvâ kŏng an sap ing hơnăm jâ dế 13 hơnăm ƀă cho iâ ngế hriâm dêi hngêi trung ‘’Vâi kơdrâi séa ngăn ki má môi’’ drêng mê nah châ rah xo mot veăng kum tung tơdroăng tơplâ tơplong peăng hdroh Tơnêi têa.  

Thươ̆ng tă Nguyễn Thị Minh tối ăm ‘nâi, hên hơnăm pêi cheăng a tíu tơplâ tơplong, thế rêh ối tung tơdroăng “kơklêa ôh tá ai hmê kâ, ôh tá ai po râm kơchâi kâ, tơngê mơdrâu đi đo’’, laga ivá ó rơdêi dêi rơxông ối nếo hiăng kum jâ tơkâ hluâ pá puât kêi đeăng hnoăng cheăng. Jâ tâ hâk phiu xua hiăng pleăng rơxông droh tơná ăm tơdroăng tơplâ tơplong tơleăng lĕm peăng hdroh tơnêi têa môi tuăn tơnêi têa:

“6 hơnăm pêi cheăng a tíu tơplâ tơplong, rơxông ối nếo laga châ pơloăng mơnúa tung tơplâ tơplong to ƀôm, pháu pá puât ó khât xua tơplâ tơplong. Á tâ tơná xông kân ƀă chiâng rơkê plĕng hên. Hên xôh á lăm pêi cheăng kum tung tơdroăng tơplâ tơplong ƀă hnê mơhno tơdroăng tơplâ rơtế pôa Võ Chí Công.

Drêng mê nah á ối kŭn, mê á thế djâ môi to kơmăi vô tuyến điê̆n ƀă 1 toăng kơmăi mơ’no on tơhrik xup ƀă kŏng vâ kơtâu tiô khu, ngin tơbrê tơbrêh ƀă xâu xua drêng mê lêng kong têa ê kô pĕng hlâ lơ rup ngin’’.

Ƀlêi trâng hâi lơ 30/4/1975 cho tơdroăng châ tơƀrê ing tơdroăng tơplâ, pleăng châ chăn mơheăm chá, krá tơniăn plâ 30 hơnăm dêi hên rơxông mơngế Việt Nam. Mê xuân cho tơdroăng châ tơƀrê ing ivá ó rơdêi tâi tâng ing Tơdroăng rŭm môi tuăn tâi tâng hdroâng mơngế tơdjêp ƀă ivá ó rơdêi rơxông nếo, ‘măn ing pơkuâ rơkê dêi Đảng Kŏng san Việt Nam. Ƀlêi trâng kố xuân ing hiâm mơno hâk vâ tơniăn krê, tơniăn lĕm, hâk vâ hơniâp lĕm môi tuăn tơnêi têa dêi tâi tâng hdroâng mơngế Việt Nam.

Phŏ yăo sư, Tiê̆n sih Nguyễn Danh Tiên, Kăn pơkuâ kơ koan xiâm tơdroăng mơnhông mơdêk Đảng, Hngêi trung kal kí Tơnêi têa Hồ Chí Minh mơnhên:

“Ƀlêi trâng kân dêi roh tơplâ xâ Mih tŏng kum tơnêi têa dêi kuăn pơlê pin ahdrối cho ƀlêi trâng dêi troăng prôk kal kí, troăng prôk cheăng lêng tơniăn krê, pơkuâ xêh, tơmiât pêi rơkê dêi Đảng. Tung roh tơplâ xâ Mih cho kơnôm Đảng mơhnhôk châ ivá ó rơdêi dêi tâi tâng kuăn pơlê plâ lêng kong têa ê mê tŭm 3 khu lêng hiăng rơtế khu cheăng kal kí ai tơrŭm krá tơniăn pơla tơplâ yu kĭch ƀă tơplâ chính quy, hlối tơplâ ai xúa pháu hnêa ƀă tơplâ ‘na kal kí, hlối tơplâ khu lêng ƀă tơdroăng ki xông tơplâ dêi kuăn pơlê ƀă troăng tơplâ ‘’tâi tâng kuăn pơlê xông tơplâ, tŭm têk tơplâ tơplong’’.

Phŏ Yăo sư, Tiê̆n sih Bùi Đình Phong, Hngêi trung kal kí Tơnêi têa Hồ Chí Minh tối: Ƀlêi trâng dêi roh tơplâ xâ Mih tŏng kum tơnêi têa cho ƀlêi trâng kân dêi kuăn pơlê Việt Nam. Ƀlêi trâng kố ai hên xiâm kối. Tung mê, xiâm kối tâi tâng: kơnôm ai troăng prôk tro, Đảng hiăng tơkŭm ivá ó rơdêi rŭm môi tuăn dêi tâi tâng kuăn pơlê, ivá dêi 2 kơpong peăng Hdroh – peăng Kơnhŏng ƀă ivá rŭm môi tuăn lâp plâi tơnêi. Nôkố, hiâm mơno rŭm môi tuăn tâi tâng hdroâng mơngế kal pơtối rak, thăm pro rơdêi tơniăn rế hiá rế krá tơniăn.

“Nôkố, kăch măng tơleăng lĕm peăng Hdroh Tơnêi têa hiăng hluâ to lâi chât hơnăm. Nôkố ôh tá chiâng ôh tá pêi cho thế mơnhông mơdêk ivá ó rơdêi rŭm môi tuăn tâi tâng hdroâng mơngế. Vâ rŭm môi tuăn thế ai pơkâ tơdjuôm, pơkâ mơ’no mâu tơdroăng vâ tơkŭm châ mâu tơdroăng ki pơxúa ăm rêm ngế vâ vâi hlê plĕng châ Đảng pơkâ mơ’no troăng hơlâ, pơkâ mơ’no mâu tơdroăng ki nhên. Ki rơhêng vâ tối cho tơdroăng pêi dêi Đảng cho tơmiât troh tơleăng tơdroăng rêh ối kế tơmeăm khoăng hiâm mơno, drêng vâi tâ hlo tơdroăng ki mê vâi kô rŭm môi tuăn, tơkŭm pá kơdâm hlá cơ Đảng ƀă pin kô ái ivá rơdêi ó gâk kring rơxông, gâk kring Đảng’’.

Hiăng 48 hơnăm hiăng hluâ. Tơdroăng ton nah rế hơngế, pin hiăng thăm hlê plĕng trâu hơngế tâ râ ki kân krip, ki khên tơnôu ƀă tuăn ngôa rơkê Việt Nam, mâu ƀai hriâm ki rơkê kơnía ing roh tơplâ xâ Mih, tŏng kum tơnêi têa, ƀă thăm nếo, mê cho ivá ó rơdêi rŭm môi tuăn tâi tâng hdroâng mơngế hiăng pro chiâng ƀlêi trâng tung tơplâ xâ nah.

Ƀă tơdroăng loi tơngah tung tơdroăng pơhlêh nếo ƀă pơkuâ rơkê dêi Đảng, tung la ngiâ dêi tơnêi têa, kuăn pơlê pói vâ Đảng pơtối mơhno hnoăng cho pơ’leăng dêi tơdroăng rŭm môi tuăn tâi tâng hdroâng mơngế vâ mơjiâng ƀă gâk kring tơnêi têa. Mơnhông mơdêk ivá ó rơdêi tâi tâng hdroâng mơngế mê Đảng thế rŭm môi tuăn, pơkuâ dêi Tơnêi têa thế rŭm môi tuăn, thế djâ troăng ahdrối, pơtối mơnhông mơdêk ivá ó rơdêi rŭm môi tuăn vâ pêi pro tơdroăng cheăng xúa kơmăi kơmok, tơnêi têa pêi cheăng tiô rơxông nếo.