VOV4.Xơ Đăng - Kơxo lơ 26/8, Kơ koan Kan sát séa ngăn Kŏng an kong pơlê Lâm Đồng hiăng rup kroăng 2 ngế pêi cheăng a Tíu xiâm mơdât pơreăng kong pơlê Lâm Đồng vâ séa ngăn, mơnhên tơdroăng kâ kơhveăm liăn ngân. 2 ngế tro rup kroăng 4 khế cho Phạm Thị Hoa ƀă pôa Nguyễn Xuân Đạt, dế pêi cheăng a Tíu xiâm mơdât pơreăng kong pơlê Lâm Đồng. Tung tơdroăng pêi pro hnoăng cheăng châ pơcháu tung roh pơreăng COVID-19 sap ing tơdế troh mơ’nui hơnăm 2021, 2 ngế kố hiăng lu lêa vâ pêi pro tơdroăng kâ kơhveăm tơmeăm khoăng ƀă kơxô̆ liăn 600 rơtuh liăn.

Kơ koan cheăng pêi pro luât séa ngăn tíu ối pêi cheăng dêi jâ Hoa ƀă pôa Đạt

Ki nhên, tŭm 2 ngế hiăng mơdêk yă tơmeăm khoăng, tơmeăm khăm pơlât. Tơdrêng amê, pêi pro khăm ngăn ki pro tơdjuôm laga chêh tung mơ-éa ki môi to xêh, kơ’nâi mê tê tơmeăm khăm pơlât, kit test ƀă mâu tơmeăm ki rơlối ăm Kŏng ti tơlo liăn cheăng kŏng ngê̆ Việt Á vâ xo liăn. Nôkố roh tơdroăng dế pơtối châ Kŏng an kong pơlê Lâm Đồng séa ngăn, po rơdâ.

A Sa Ly tơplôu ƀă tơbleăng