Riân troh kơxê măng lơ 13/6, Trung tươ̆ng Tô Ân Xô tối ăm ‘nâi, mâu khu kŏng an ki lăm rup pơtối pêi hnoăng cheăng ƀă hiăng rup tơ’nôm 6 ngế, mơdêk tâi tâng kơxô̆ mơngế châ rup ai 45 ngế. Kŏng an dế tơkŭm kơ-êng mâu ngế pro xôi hiăng châ rup ƀă pơtối rup mâu ngế veăng ki ê nếo.

Nôkố mâu khu cheăng xuân dế pơtối pơtrui tăng rup mâu ngế ki veăng ki ê vâ pơxâu phâk kơtăng tiô pơkâ dêi luât. Hdrối mê, kơxo má lơ 11/6, a tơring Čư Kuin hiăng ai roh tơdroăng môi khu ngế râng hnêa mot a tíu pêi cheăng Vi ƀan cheăm Ea Tiêu ƀă Ea Ktur pro mâu ngế kŏng an cheăm, kăn ƀô̆ cheăm, kuăn pơlê hlâ ƀă tro rong...

Klêi kơ’nâi ai roh tơdroăng kố, Khu xiâm pơkuâ Kŏng an hiăng hnê mơhno Kŏng an Dak Lak, mâu tíu cheăng lăm tăng rup khu ngế ki tối a kơpêng mê, tŏng kum mâu kuăn pơlê ki tro mâu ngế ‘mêi tong rup kơtôa. Khu xiâm pơkuâ Kŏng an pơkâ thế vâi krâ kuăn pơlê tơring Čư Kuin ƀă mâu kuăn pơlê ki achê mê ôh tá xâu, ôh tá lối tô tuăn; pêi pro tiô pơkâ dêi khu râ kăn pơkuâ a tơring ƀă mâu kơvâ cheăng.

Tâng kơbố ‘nâi tơdroăng tơdjâk khu ki tối a kơpêng mê, thế tối pơtâng ăm kơ koan Kŏng an tíu achê má môi. Ƀă mâu kơ koan chêh hlá tơbeăng kal mơnhên inhên tơdroăng ahdrối tơbleăng ƀai vâ tơniăn tơdroăng tro khât.