VOV4.Xơ Đăng - Khu xiâm pơkuâ Kŏng an tơkŭm po hneăng hôp mơ’no tơdrêng tung um tiô troăng hyôh măng lâp tơnêi têa po rơdâ pêi pro pơkâ pêi tâi tâng séa ngăn tơniăn ‘na tơdroăng hbrâ mơdât on chếo, tơpâ on chếo ƀă tŏng kum mơngế hliăng tiâ. Tiô pơkâ pêi dêi Khu xiâm pơkuâ kŏng an, roh lo lăm séa ngăn ‘na rak tơniăn ‘na hbrâ mơdât on chếo, tơpâ on chếo ƀă tŏng xo mâu ngế hliăng tiâ roh kố tơkŭm po sap hâi lơ 15/10/2022 troh lơ 15/12/2022.

Khu xiâm pơkuâ Kŏng an kô séa ngăn tâi tâng tơdroăng hbrâ mơdât on chếo, tơpâ on chếo

Kŏng an mâu tíu cheăng, kong pơlê kô tơkŭm séa ngăn tơniăn hbrâ mơdât on chếo, tơpâ on chếo ƀă tŏng kum mâu ngế hliăng tiâ ƀă tâi tâng mâu tíu cheăng ối tung pơkuâ tơnêi têa ‘na hbrâ mơdât on chếo, tơpâ on chếo. Tung mê tơkŭm séa ngăn nhên mâu tíu mơdró tơniăn lĕm, tíu mơdró kân, tơkŭm kơdrâm mơngế, tơ’lêi rơ-iô, tơ’lêi chếo, pơtôu môi tiah hngêi ăm tơmối koi ối pơtê, hngêi trŏ, kuăn ƀar, tíu kơhnhon xuâng ôu kâ nhâ̆u, tíu hngêi tơdjuôm, hngêi hên râ, tíu xiâm tê mơdró, hnôu, tíu mơjiâng pro tơmeăm.

VOV Tây Nguyên/Tơplôu: A Sa Ly