Kong pơlê Lâm Đồng tơrŭm ƀă Hok viê̆n Chĭnh trĭ dêi Tơnêi têa inâi Hồ Chí Minh tơkŭm po Hôp tơno Khoa hok ‘’Troăng pêi mơnhông kong pơlê Lâm Đồng: Tơmeăm ki tơ’lêi ƀă mơnhông châ tơƀrê’’. Klêi kơ’nâi rah xo lế lĕm tro kơ koan pêi cheăng tơnêi têa, kong pơlê Lâm Đồng ai hên tơdroăng ki tơ’lêi vâ mơnhông. Kong pơlê ai tíu kân rơdâ ing kơpong kân rơdâ troh kơpong tơbăng, kong kế, nhâ loăng hên, tơmeăm mơnhông hên ‘na pêi chiâk deăng xúa kŏng ngê̆ rơxông nếo, ôm hyô, on tơhrik, tơmeăm khoăng tung kơdâm tơnêi rơtế khôi túa lĕm tro hên.

Kố cho rôh tơ’lêi vâ mơjiâng mâu tơdroăng cheăng kâ, tơdroăng ki tơtêk nếo ƀă thăm tơdjêp kơpong. Laga, kong pơlê xuân trâm hên pơloăng mơnúa môi tiah hngêi trăng, troăng klông tá hâi tơdâng tơ’mô, tơdjêp kơpong ối iâ, tơdroăng cheăng kâ tá hâi tơxâng ƀă tơmeăm ki ai hlâu, ki rơkê dêi mơngế pêi cheăng ƀă tơdroăng ki pơhlêh nếo tơmiât pêi rơkê tá hâi tơxâng pơkâ mơnhông mơdêk.

Xông tơpui a hôp tơpui tơno, pôa Y Thanh Hà Niê Kđăm, Kăn cheăng tung Tíu xiâm Đảng, Kăn pơkuâ hnê ngăn Đảng kong pơlê Lâm Đồng tối, mâu troăng pêi tơtêk tiô khôi vâi krâ nah ôh tá tŭm tơnêi ki rơlối vâ châ tơƀrê hluâ pơkâ, pơkâ thế Lâm Đồng thế ti tăng tơdroăng ki vâ mơnhông nếo ƀă tơmiât troăng pêi cheăng ton xŏn nếo tơtro ƀă tơdroăng ki pơhlêh xúa kŏng ngê̆ kơxô̆ ƀă tơtêk tơ’lêi lĕm.

‘’Kong pơlê kal ‘’ivá cheăng ki mơdêk’’ nếo, môi tơdroăng tơmiât ton xŏn mơnhông châ tơƀrê hluâ pơkâ vâ vêh mơnhên tíu cheăng dêi Lâm Đồng tung tơnêi têa ƀă kơpong. Xua mê, Hôp tơno ‘na khoa hok ôh tá xê to hôp tơpui vâ pin vêh mơnhên mâu tơdroăng ki klâi hiăng chiâng pêi, mê ki kal tâ, cho tíu tơpui tơno tơdroăng tiô mâu tơdroăng khoa hok ƀă tơdroăng nôkố vâ ti tăng mâu troăng pêi ki châ tơƀrê, chiâng pêi pro, pêi pro mâu tơdroăng vâ mơnhông dêi kong pơlê Lâm Đồng tung hneăng nếo’’.

Phŏ Yăo sư - Tiê̆n sih Đoàn Minh Huấn, Kăn cheăng tung Khu xiâm kal kí, Kăn pơkuâ Hok viê̆n Chĭnh trĭ dêi tơnêi têa inâi Hồ Chí Minh tối nhên, Lâm Đồng dế pơkuâ hên tơdroăng ki tơ’lêi hlâu hôm ‘na kong kế, nhâ loăng, pêi chiâk deăng xúa kŏng ngê̆ rơxông nếo, on tơhrik ki vêh pro, tơmeăm tung kơdâm tơnêi ƀă ôm hyô. Kố cho tơdroăng ki xiâm vâ kong pơlê mơnhông mâu troăng cheăng kâ krúa lĕm, cheăng kâ têk chu chu têk, cheăng kâ têa kơxĭ ƀă mâu kơvâ kơmăi kơmok uâ trâu hơngế.

‘’Hôp tơno tơkŭm po tơpui tơno mâu troăng pơkâ ki phá tơ-ê vâ mơjiâng tơdroăng ki châ tơƀrê ăm mơnhông ƀă pêi pro hnoăng cheăng dêi mâu kơpong cheăng kâ, ki má lối cho cheăng kâ krê tung pơhlêh nếo túa tơtêk dêi Lâm Đồng. Tơmiât rơdêi pơtối mot tơniăn tơtêk péa kơxô̆, tung mê kal pêi inhên mâu troăng pêi ‘na xing xoăng râ, xing xoăng hnoăng, pro tơniăn tíu mơ’no liăn cheăng tê mơdró, mơdêk ki dâi lĕm pơkuâ ƀă châ tơƀrê pơkuâ mơnhông mơdêk’’.