Hneăng tơ’noăng mơgêi hriâm râ má pái phôh thong hơnăm kố kong pơlê Kon Tum ai lối 5 rơpâu ngế hok tro, tâk 273 ngế hok tro tâng vâ pơchông ƀă hơnăm nah. Tung mê, ai lối 4.800 ngế hok tro tơ’noăng tiô tơdroăng hriâm râ má pái phôh thong ƀă lối 160 ngế hok tro tơ’noăng tiô tơdroăng hriâm yăo yuk thường xuyên. Kơxô̆ hok tro kuăn ngo veăng tơ’noăng ai lối 1.700 ngế, hok tro ki ôh tá plah tơ’noăng mâu hơnăm hdrối nah pâ tơ’noăng hơnăm kố  ai 220 ngế.

Kong pơlê Kon Tum hiăng mơjiâng 12 tíu tơ’noăng, tung mê ai 5 tíu tơ’noăng a pơlê kong kơdrâm Kon Tum, 7 tíu tơ’noăng a mâu tơring ƀă mơngế ki ngăn tơ’noăng a mâu tíu tơ’noăng ai lối 900 ngế. Thái Bùi Văn Quốc, Kăn phŏ pơkuâ hngêi trung phôh thong hnê kuăn ngo ai tíu kâ koi ối pơtê - hngêi trung râ má péa tơring Kon Plông, ăm ‘nâi, hơnăm kố, hngêi trung ai 82 ngế hok tro veăng tơ’noăng mơgêi hriâm râ má pái phôh thong ƀă tâi tâng mê to vâi o hdroâng kuăn ngo Rơteăng:

“Troh nôkố hngêi trung hiăng pê klêi tơdroăng rơbot ƀai rôh má I, hngêi trung xuân hiăng tơkŭm po ăm hok tro mơnúa tơ’noăng. Tung la ngiâ hngêi trung pơtối klâ mâu hok tro ki hriâm plong kol vâ hnê tơ’nôm ăm vâi vâ vâi mơ-eăm tâ nếo vâ ai tiô pơkâ tâi tâng hok tro châ plah tơ’noăng mơgêi hriâm râ má pái.

‘Na tơdroăng ăm kâ hmê, hngêi trung hnê mơhno ăm mâu khu cheăng tung hngêi trung mơdêk ‘na hmê kơchâi kâ ăm mâu vâi o tung pơla khế 6 vâ vâi o hok tro ai ivá mo lĕm tung mâu hâi tơ’noăng’’.

Hneăng tơ’noăng mơgêi hriâm râ má pái phôh thong hơnăm 2023, kong pơlê Gia Lai ai lối 14.800 ngế hok tro chêh inâi tơ’noăng, tung mê ai lối 3.100 ngế hok tro kuăn ngo. Kong pơlê mơhnhôk dâng 2.300 ngế kăn ƀô̆ pêi tơdroăng ngăn tơ’noăng a 41 tíu tơ’noăng a 17 tơring, pơlê krâm, pơlê kong kơdrâm. Khu hnê mơhno râ kong pơlê hiăng pâ thế Vi ƀan mâu tơring, pơlê krâm, pơlê kong kơdrâm ƀă mâu kơvâ cheăng ki tơdjâk troh veăng kum hok tro ‘na rơxế to lăm tơ’noăng, mơhno tíu kâ ối ăm hok tro.

Pakĭng mê, séa ngăn, tí tăng ngăn, veăng kum liăn ăm hok tro cho kuăn ‘nĕng kuăn ngo, rơpŏng hngêi kơtiê xơpá, hok tro ối kơpong hngế hngo. Malối pôi tá ăm ai hok tro ki lâi lôi tơ’noăng xua trâm xơpá ‘na kế kâ tíu ối lơ ‘na liăn prôk lăm tơ’noăng.

Tối tơbleăng a roh pêi cheăng ƀă Khu hnê mơhno Hneăng tơ’noăng mơgêi hriâm râ má pái phôh thong 2 kong pơlê Kon Tum ƀă Gia Lai, jâ Ngô Thị Minh, Ngế xiâm phŏ ngăn hnê hriâm ƀă hnê mơjiâng tuăn ngôa rơkê hlo hlối khĕn kơdeăn khât hnoăng cheăng hbrâ tơkŭm po hneăng tơ’noăng ki ‘nâi hbrâ rơnáu dêi mâu kong pơlê.

Pakĭng mê, pâ thế mâu hngêi trung mâu tíu tơdjâk troh thế pơtối pêi kơtăng mâu pơkâ dêi khu xiâm ngăn hnê hriâm ƀă hnê mơjiâng tuăn ngôa rơkê ‘na tơdroăng tơ’noăng; séa ngăn mâu tơdroăng ki hbrâ vâ châ ‘nâi ƀă teăm tơkâ luâ xơpá mâu tơdroăng ki trâm. Mơdêk hnê tối, hnê ăm mâu hok tro ƀă nôu pâ hok tro hlê luât pơkâ tơ’noăng; hbrâ tơrŭm nhên ƀă mâu kơ koan khu râ pơkuâ cheăng vâ tơniăn, tơdâng tơ’nôm, tơtro ăm hneăng tơ’noăng.

Jâ Ngô Thị Minh, Ngế xiâm phŏ ngăn hnê hriâm ƀă hnê mơjiâng tuăn ngôa rơkê, tối:

“Khu hnê mơhno dêi kong pơlê ‘na tơ’noăng mơgêi hriâm râ má pái phôh thong 2023 hiăng pêi tro tiô pơkâ ƀă ‘nâi hbrâ rơnáu hdrối mâu tơdroăng cheăng dêi tơná. Tơdroăng hnê pơtâp ăm mâu ngế ngăn tơ’noăng cho tơdroăng pêi pro ki kal khât, kô hlo mâu tơdroăng ki lâi chêh ƀă hlá mơ-éa hlo hâi tơtro mê kong pơlê pâ thế, tơpui tơno vâ rêm rôh klêi tơ’noăng, hneăng tơ’noăng hơnăm kơ’nâi ah kô tơƀrê tơniăn tâ hơnăm hdrối.

Luât pơkâ tơ’noăng ƀă vâi o hok tro ki veăng tơ’noăng mê pin xuân pôi tá tơngôu, tơdroăng tơbleăng luât pơkâ ăm mâu vâi o hok tro thế pơ’lêh nếo tơdroăng tơbleăng luât pơkâ tơ’noăng, vâ mâu vâi o xuân cho mâu ngế tung khu ki mê. Tơdroăng vâi o hok tro veăng tơ’noăng ƀă hnoăng pêi pro ‘na chôu pơkâ, luât pơkâ xuân kal thế mơ-eăm hnê tối ăm rêm ngế mâu hâi o hok tro ‘nâi’’.

Jâ Ngô Thị Minh, Ngế xiâm phŏ ngăn hnê hriâm ƀă hnê mơjiâng tuăn ngôa rơkê xuân pơkâ thế mâu kong pơlê hnê tối vâ pôi tá tơngôu; tung tơdroăng  hnê pơtâp ăm mâu ngế ngăn tơ’noăng hriâm Luât pơkâ tơ’noăng kal hơ’lêh nếo troăng pêi pro vâ mơngế ki pơtâm hriâm ngăn tơ’noăng hlê tâi tâng luât pơkâ, pêi tro hnoăng cheăng dêi tơná; hbrâ mâu tơdroăng ki tơná hlê vâ pêi tro hnoăng cheăng dêi tơná a hneăng tơ’noăng hbrâ lơ ai mâu tơdroăng nếo trâm; pơkâ séa ngăn dêi Khu hnê mơhno Tơ’noăng thế châ hbrâ inhên tŭm tơdroăng.

Jâ Ngô Thị Minh, Ngế xiâm phŏ ngăn hnê hriâm ƀă hnê mơjiâng tuăn ngôa rơkê, tối nhên:

“Hneăng tơ’noăng thế rak tơniăn tiô pơkâ. Tơniăn ‘na ivá, châ chăn mâu vâi o hok tro. Pin mơ-eăm vâ mâu vâi o mot tung lâm tơ’noăng tung tuăn ngôa hơniâp ro ôh tá tô tuăn klâi. Tơniăn krúa ‘na kế kâ. Tơniăn tung pơla kong mêi, troăng hliâk vâi o prôk lăm tơ’noăng pá puât. Tơniăn tung hbrâ mơdât on chếo kế pơtôu ‘na hía drêng hiăng mêi chiâng ai tơdroăng tit on tơhrik. Thế rak tơniăn ‘na ko ƀai tơ’noăng, ƀai pro tơ’noăng. Tơ’niăn hbrâ mơdât pơreăng vâ rôh tơ’noăng tơniăn lĕm’’.

Hneăng tơ’noăng mơgêi hriâm râ má pái phôh thong hơnăm 2023 po a mơ’nui khế 6. Tung mê, hâi lơ 27/6 cho hâi pro hlá mơ-éa tơ’noăng. Tơkŭm po tơ’noăng mơgêi hriâm râ má pái phôh thong a 2 hâi lơ 28 ƀă 29/6. Mâu kong pơlê thế tơmâng khât troh tơdroăng tối tơbleăng tung hlá tơbeăng yôh rơ’jíu vâ hok tro, nôu pâ ƀă pơlê pơla hlê ‘na ki kal pơxúa dêi hneăng tơ’noăng mơgêi hriâm râ má pái phôh thong; Teăng khĕn kơdeăn ƀă mâu khu tơrŭm cheăng, mâu ngế ki ai hnoăng cheăng tung tơdroăng tơkŭm po tơ’noăng xuân môi tiah tơleăng mơnhên mâu ngế ki pro xôi tơdjâk troh hneăng tơ’noăng.