A kong pơlê Dak Lak, tơdroăng kring vế ăm hneăng tơ’noăng xuân châ kơvâ cheăng pơkâ pêi pro kơhnâ, krâu khât. Ôh ti xê to a lâm hriâm, a mâu kơbong dêi mâu hok tro ối dêi Hngêi trung râ má pái ai tíu kâ koi ối pơtê – hngêi trung râ má péa tơring Kon Plông, tơdroăng ki hriâm rơbot ƀai xuân hlo kơtăng khât. Pakĭng chôu ki châ thái cô hnê a lâm, 82 ngế hok tro dêi hngêi trung veăng tung rôh tơ’noăng râ má pái hơnăm kố vâi xuân hbrâ kơchăng xêh tung tơdroăng ki hriâm rơbot ƀai.

O Trần Trung Thành, hok tro lâm 12B, ăm ‘nâi:

“Ngin klâ xoăng chôu peăng kơxo hriâm rơbot ƀă hriâm a lâm. Peăng kơxê rế rơbot, rế pơtê xah hêi vâ pôi tá ai tơdroăng tơmiât hên. Ngin mơ-eăm ƀă mơ-eăm tâi ivá vâ chôu pâ mâu tơdroăng ki mâu thái cô hiăng rơbot ăm xuân môi tiah ngin o bro tơ’nôm hên ko ƀai tơ’noăng ki mơnúa, séa ngăn pơchuât ko ƀai tơ’noăng dêi mâu hơnăm hdrối nah vâ chôu vế khât ăm hneăng tơ’noăng râ má pái phôh thong tơnêi têa hiăng vâ chê troh la ngiâ”.

Ƀă 69 ngế hok tro cho kuăn muăn hdroâng kuăn ngo veăng tơ’noăng tung hneăng tơ’noăng râ má pái phôh thong hơnăm kố, thái Bùi Văn Quế, kăn phŏ pơkuâ hngêi trung hdroâng kuăn ngo ai tíu kâ koi ối pơtê – Hngêi trung râ má péa tơring Kon Plông, ăm ‘nâi Khu pơkuâ hngêi trung ƀă mâu thái cô tơmâng ngăn khât troh vâi o, môi tiah: xing xoăng thái cô pơkuâ ngăn tơdroăng ki hriâm rơbot ƀai dêi mâu vâi o hok tro a kong măng; ƀă mâu vâi o hok tro ki hriâm ôh tá rơkê xoăng thái cô hnê tơ’nôm, hnê krê vâ kum vâi o ai tơ’nôm tơdroăng ki loi tơngah mot tung lâm tơ’noăng:

“Khu pơkuâ hngêi trung hmâ achê, tơmâng ngăn, mơhnhôk mâu vâi o tung tơdroăng ki hriâm tâp a lâm. Pakĭng mê tung mâu rôh kâ hmê rêm hâi ngin lăm troh a tíu kâ hmê kơ-êng mâu vâi o ‘na tơdroăng ki ôu kâ. Khu pơkuâ hngêi trung chêh bro mơ-éa pơtroh pâ Vi ƀan hnê ngăn tơring Kon Plông kum liăn ăm 69 ngế hok tro hdroâng kuăn ngo ‘na liăn kâ tung pơla 4 hâi mâu vâi o tơ’noăng vâ mơdêk kế tơ’nôm kế kâ ăm mâu vâi o ƀă thăm mơhnhôk mâu vâi o tâ nếo”.

Hneăng tơ’noăng râ má pái phôh thong hơnăm kố kong pơlê Kon Tum ai 5.028 ngế tơ’noăng, tung mê ai 1.722 ngế cho hdroâng kuăn ngo. Jâ Phạm Thị Trung, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum ăm ‘nâi, pơreăng COVID-19 ton tung to lâi hơnăm hiăng tơdjâk kân troh tơdroăng hriâm dêi mâu vâi o hok tro tối tơdjuôm ƀă kuăn muăn hdroâng kuăn ngo tối krê.

Vâ kum tơrêm ngế o chôu pâ khât mâu tơdroăng ki hiăng hriâm, tơdroăng ki ƀai tơ’noăng, Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum pêi pro troăng hơlâ phá tơ-ê hơ’lêh tung hriâm rơbot ƀai:

“Hiăng vâ troh hneăng tơ’noăng Khu ngăn hnê hriâm ƀă hnê mơjiâng tuăn ngoâ rơkê mơjiâng bro Tôh tơdroăng pơkâ ukố umê troh rêm to hngêi trung pơcháu tơdroăng pơkâ ƀă veăng ai mâ a mâu chôu rơbot ƀai tiô troăng tơmiât phá tung hriâm rơbot. Rêm ngế o cho môi túa pơkâ, tơdroăng rơhêng vâ krê. Rơbot ƀai tung hiâm mơno mê vâ mâu vâi o hlo ‘na tơdroăng ki ối ‘ro ƀă ki rơdêi dêi tơná.

Klêi kơ’nâi tơ’noăng mơnúa pơla hdrối kố mê ngin rah xo, klâ xoăng môi hdroh nếo. Mâu vâi o hok tro ki kal châ tŏng kum mê mâu hngêi trung mơjiâng mâu inâi, khu hnê kum hok tro ai tŭm tơdroăng ki tơngah ‘na mâu tơdroăng ki hiăng hriâm xuân môi tiah tơdroăng ki veăng tung rôh tơ’noăng kố”.

Hneăng tơ’noăng hơnăm kố, lâp kong pơlê Dak Lak 21.000 ngế chêh inâi tơ’noăng, tung mê hok tro hdroâng kuăn ngo châ 28%. ‘Na tíu tơ’noăng, ai 33 tíu tơ’noăng ki khât ƀă tâi tâng ai 900 to lâm tơ’noăng. Troh nôkố, mâu tíu pêi cheăng hiăng rak vế tŭm mâu tơdroăng liăn ngân, kế tơmeăm a mâu tíu tơ’noăng, tíu ki sao in ko ƀai tơ’noăng ƀă tíu châ̆m tơ’noăng tiô pơkâ.

Khu ngăn hnê hriâm ƀă hnê mơjiâng tuăn ngoâ rơkê rơtế xoăng vâ chê 3.000 ngế kăn ƀô̆, ngăn tơ’noăng, séa ngăn, kum tung hneăng tơ’noăng, hbrâ rơnáu mâu kơƀăng tăng,hbrâ mơdât châi tamo ăm mâu ngế ki tơ’noăng vâ châ rak vế tơniăn. Khu hnê mơhno hneăng tơ’noăng, ăm ‘nâi dế pêi pro tro hnoăng cheăng hnê tối, mơhnhôk hiâm mơno vâ hok tro hmiân tuăn tơ’noăng. Tơdrêng amê hlối tối rơdêi hiăng hbrâ rơnáu nhên, rak vế gâk kring tơniăn má môi tung mâu hâi ki po tơ’noăng.

Đăi tă Nguyễn Hữu Lương, Ngế xiâm pơkuâ Gâk kring kal kí, kŏng an kong pơlê Dak Lak ăm ‘nâi:

“Tâi tâng mâu tơdroăng cheăng ki ai tơdjâk troh mâu ngế ki bro xôi tung rôh ôh tá tơniăn a Čư̆ Kuin maluâ tơdjâk troh ‘na tơdroăng rak vế tơniăn ngin hlo tiah kố ôh tá ai klâi tôu tuăn vâ tơkŭm po tơ’noăng mâu vâi o a kong pơlê Dak Lak nôkố. Mâu khu kŏng an kong pơlê Dak Lak tơrŭm krá tơniăn ƀă khu ngăn hnê hriâm môi tuăn tâi tâng tung mâu tơdroăng cheăng pơla râ kong pơlê troh a râ tơring kô rak vế tơniăn gâk kring ăm hneăng tơ’noăng hơnăm kố”.