VOV4.Xơ Đăng - A kơpong Tây Nguyên, mâu kăn ƀă kơvâ cheăng xuân dế tơkŭm tơbleăng mâu tơdroăng hbrâ vâ ví khía rôh má 4 plong mot. Kơxo lơ 27/9, kong pơlê Kon Tum mơjiâng khu kăn lăm troh a mâu tơring ki xiâm tối ăm ‘nâi tơdroăng mơni kô tơdjâk ó troh khía mơhot kân roh má 4 plong mot vâ pơtối séa ngăn, tí tăng ‘nâi plĕng. Mâu tơring dêi kong pơlê Kon Tum châ mơnhên tối kô tơdjâk ó drêng ai khía mơhot kân rôh má 4 plong mot a tơnêi, mê cho tơring: Đăk Glei, Tu Mrông, Kon Rẫy ƀă Kon Plông.

Gak ngăn a tíu krâ ‘măn kơmăi biến áp 500 kV Plei Ku vâ hbrâ ví khía rôh má 4 plong mot

Mâu kăn ƀă kơvâ cheăng thế xĕn kuăn pơlê lo ing kơpong ki rơ-iô tơnêi kô tơhnah  lăm ối a tíu tơniăn. A Gia Lai, Kŏng ti ngăn on tơhrik Gia Lai séa ngăn mâu tíu ki hiăng vâ tơ’nhiê, ‘mai rơnêu, pro ăm on tơhrik châ kơtâu tơniăn vâ tơnêi ôh tá tro tơhnâp, tơnêi rơlêa. A Dak Lak, cho kong pơlê ki ai hên long têa kân má môi a Tây Nguyên, mê tơdroăng rak ngăn long rơchôa châ tơmâng khât, vâ tơniăn drêng mơ’no têa ƀă hbrâ mơdât têa lân lu drêng khía mơhot khât plong mot. A kong pơlê Lâm Đồng hiăng hnê mơhno mâu kŏng ti dế rak ngăn, pro rơchoâ hngêi kơmăi on tơhrik thế pro tơniăn tro tiô pơkâ.

VOV Tây Nguyên/Tơplôu: Gương